نئی دہلی :(ایجنسی)
مرکزی وزارت اطلاعات و نشریات نے مقبول ملیالم نیوز چینل میڈیا ون (Media One) پر پابندی لگا دی ہے۔ لیکن اس کے بعدکیرالہ ہائی کورٹ نے پیر کوسماعت کی اگلی تاریخ تک حکم عارضی طور پر ٹال دیا ،یعنی اسٹے لگادیا۔ معاملےکی اگلی سماعت بدھ کو ہوگی۔ ملیالم زبان کے معروف نیوز چینل میڈیا ون ، جس سے جماعت اسلامی کی حمایت حاصل ہے، کے نشر کو مرکزی وزارت نے ’سیکورٹی وجوہات‘ کا حوالہ دیتے ہوئے روک دیاتھا۔ چینل پیر دوپہر کو آف ایئر ہو گیاتھا۔
میڈیا ون ٹی وی کے ایڈیٹر پرمود رامن نے ایک بیان میں کہا کہ وزارت اطلاعات و نشریات نے چینل پر نشریات پر پابندی عائد کر دی ہے۔ ’وزارت نے کہا ہے کہ پابندی سیکورٹی وجوہات کی بناء پر لگائی گئی تھی، لیکن چینل کو ابھی تک اس کی تفصیلات نہیں مل سکی ہیں۔ چینل نے اپنے بیان میں کہا کہ مرکزی حکومت نے بھی میڈیاون ٹی وی پر پابندی کے بارے میں تفصیلات فراہم نہیں کی ہیں۔ ہم نے پابندی کے خلاف قانونی کارروائی شروع کر دی ہے۔ اس عمل کو مکمل کرنے کے بعد، چینل دوبارہ ناظرین کے پاس آجائے گا۔ چینل نے اسکرین پر پیغام چلایا -’ہم اس امید کے ساتھ نشریات کو عارضی طور پر معطل کر رہے ہیں کہ آخرکار انصاف ملے گا۔‘
چینل کے ذرائع نے بتایا کہ ٹی وی چینل کے لائسنس کی مدت ختم نہیں ہوئی لیکن جب پابندی آئی تو چینل کے لائسنس کی تجدید کا عمل جاری تھا۔ اگرچہ وزارت اطلاعات و نشریات کی جانب سے کوئی باضابطہ بیان سامنے نہیں آیا، تاہم وزارت کے سینئر ذرائع نے بتایا کہ اسے بلاک کرنے کا حکم اس لیے جاری کیا گیا کیونکہ چینل نے سیکورٹی کلیئرنس حاصل نہیں کی تھی۔ ایک اہلکار نے نوٹ کیا کہ چینل کو نیوز کے زمرے میں نجی سیٹلائٹ ٹی وی چینل کے طور پر لائسنس کی تجدید کے لیے ’سیکورٹی کلیئرنس سے انکارکردیا گیاتھا‘ جو موجودہ پالیسی کے مطابق 10 سال کی مدت کے لیے دی جاتی ہے۔
وزارت کے چینلز کی فہرست سے پتہ چلتا ہے کہ میڈیا ون ٹی وی چینل نیوز کیٹیگری کے تحت جس کی ملکیت میڈیم براڈکاسٹنگ لمیٹڈ کے پاس ہے ستمبر 2011 سے اپ لنکنگ اور ڈاؤن لنکنگ کی اجازت ہے۔
