لکھنؤ :(ایجنسی)
اہم اپوزیشن پارٹی سماج وادی پارٹی کے سربراہ اکھلیش یادو اترپردیش اسمبلی انتخابات میں مین پوری کی کرہل (اسمبلی حلقہ 110) سیٹ سے الیکشن لڑ رہے ہیں۔ وہ پہلی بار اسمبلی انتخابات میں حصہ لے رہے ہیں اور انہوں نے آج کرہل سیٹ سے اپنا پرچہ نامزدگی بھی داخل کردیا۔
پرچہ نامزدگی میں دی گئی معلومات کے مطابق اکھلیش یادو 40 کروڑ سے زیادہ کے اثاثوں کے مالک ہیں۔ اس میں بینکوں میں جمع رقم اور منقولہ اور غیر منقولہ جائیداد دونوں شامل ہیں۔
اکھلیش یادو نے پرچہ نامزدگی میں یہ معلومات دی ہیں۔ ان کے مطابق ان کے مختلف بینک کھاتوں میں 8.43 کروڑ روپے جمع ہیں۔ اکھلیش یادو کے پاس تقریباً 17.93 ایکڑ زمین ہے جس کی مالیت کروڑوں روپے ہے۔
الیکشن کمیشن کو دی گئی معلومات کے مطابق اکھلیش یادو کے پاس 17.22 کروڑ روپے کی غیر زرعی زمین اور کئی مکانات ہیں۔
حلف نامے میں دی گئی معلومات کے مطابق اکھلیش یادو پر بینک سمیت دیگر قرض تقریباً 28.97 لاکھ روپے کا ہے۔ دوسری جانب اگر ان کی اہلیہ کی بات کریں تو ڈمپل یادو کے بینک اکاؤنٹ میں 58 لاکھ 92 ہزار روپے جمع ہیں۔
بینکوں میں جمع کیش کے علاوہ اکھلیش یادو کی اہلیہ کے پاس 4 کروڑ 76 لاکھ 84 ہزار روپے مالیت کے منقولہ اثاثے ہیں، جبکہ غیر منقولہ اثاثوں کی مالیت تقریباً 10 کروڑ روپے ہے۔
