نئی دہلی : (ایجنسی)
مرکزی وزیر خزانہ نرملا سیتا رمن نے منگل کو مالی سال 2022-23 کا بجٹ پیش کیا۔ اس بجٹ میں وزیر خزانہ نے مسلسل دوسری بار پیپر لیس بجٹ پیش کیا ہے۔ اس بجٹ تقریر کے دوران نرملا سیتا رمن نے کئی بڑے اعلانات کیے ہیں۔ اس دوران انہوں نے ہندوستان میں 5G متعارف کرانے، دیہاتوں میں براڈ بینڈ کنکشن شروع کرانے کااعلان کیا ہے۔ اس کے ساتھ ہی انہوں نے اپنی بجٹ تقریر میں نوجوانوں کو راحت دیتے ہوئے 60 ہزار نوجوانوں کو نوکریاں دینے کی بات کہی ہے۔ ساتھ ہی پی ایم آواس یوجنا کے تحت 80 لاکھ گھر بنائے جائیں گے۔
اس کے علاوہ نرملا سیتارامن نے ڈیجیٹل کرنسی کے حوالے سے بڑا اعلان کرتے ہوئے کہا کہ 2022-23 سے RBI کی جانب سے کرپٹو کرنسی متعارف کروائی جائے گی۔ ان تمام بڑے اعلانات کے بعد ملک میں بہت سی چیزیں سستی اور مہنگی ہو چکی ہیں۔ سستی اشیاء کی بات کریں تو موبائل فون سے لے کر چارجر اور کپڑے تک سستے کر دیے گئے ہیں۔ اس کے ساتھ عام آدمی کو ریلیف دینے کے لیے مزید چیزیں سستی کر دی گئی ہیں۔ اور کسٹم ڈیوٹی کم کر دی گئی ہے۔ آئیے جانتے ہیں کون سی چیزیں سستی اور کون سی مہنگی ہوئیں؟
کیا ہوا مہنگا کیا
عام بجٹ 2022 کی پیش ہونے کے بعد سے کیپٹل گڈز پردرآمد ڈیوٹی میں چھوٹ ختم کردی گئی ہے۔اس پر 7.5 فیصد درآمدڈیوٹی عائد کی گئی ہے۔ وہیں امیٹیشن جیولری پر کسٹم ڈیوٹی بڑھا دی گئی، اس کی وجہ درآمدات میں کمی کرنا ہے۔ ساتھ ہی غیر ملکی چھاتا بھی مہنگا ہو جائے گا۔
کیا سستا ہوا
بجٹ پیش ہونے کے بعد سستی چیزوں کی بات کریں تو کپڑے، چمڑے کا سامان، موبائل فون، چارجر، ہیرے کے زیورات، زرعی سامان سستے ہو جائیں گے۔ اس کے علاوہ ہیروں پر کسٹم ڈیوٹی کم کر دی گئی ہے۔ اس کے علاوہ غیر ملکی مشینیں اور الیکٹرانک اشیاء بھی سستی ہو جائیں گی۔
