سونی پت:(ایجنسی)
ہریانہ پولیس نے سونی پت میں پاکستانی دہشت گرد تنظیم جیش محمد کی مدد کرنے والے تین لوگوں کو گرفتار کیا ہے۔ پکڑے گئے لوگوں میں میاں بیوی اور ان کا ساتھی شامل ہے۔ ملزمین کی شناخت روی، وریندر دیپ کور اور کنبھ کے طور پر کی گئی ہے۔ روی اور ویریندر دیپ کور میاں بیوی ہیں، جبکہ کنبھ ان کا ساتھی ہے۔ میاں بیوی پنجاب کے ترن تارن کے رہنے والے ہیں جبکہ ان کا ساتھی جالندھر سے ہے۔
تینوں ملزمین فرضی پاسپورٹ کے ذریعے ملک سے بھاگنے کےلیے دہلی ایئر پورٹ جارہے تھے، اسی دوران انہیں گرفتار کرلیاگیا۔ سیکورٹی ایجنسیوں کے مطابق ملزمین پاکستان میں دہشت گرد تنظیم کے سربراہوں کے رابطے میں تھے، جموں وکشمیر میں دہشت گردوں کی فنڈنگ کرتے تھے، جموں وکشمیر پولیس سے ان پٹ ملا تھا کہ جیش محمد کے تین مد د گار نجی گاڑی سے سونی پت سے گزریں گے۔ سونی پت پولیس کو تینوں مشتبہ کی شناخت کےلیے فوٹو مہیا کرائے گئے، اس کے بعد پولیس حرکت میں آگئی اور گنور مرتھل کے درمیان ناکہ بندی کرکے نگرانی شروع کردی۔ اسی درمیان اتوار30 جنوری کو دیر رات کار سے ایک خاتون اور دو نوجوان آتے دکھے، پولیس نے انہیں روکنے کے بعد حراست میں لے لیا، تلاشی کے دوران ان کے پاس سے فتح آباد سے تیار کرائے گئے فرضی پاسپورٹ برآمد کیے گئے، اس کی اطلاع جموں وکشمیر پولیس کے دہلی دفتر کو دی گئی، جموں وکشمیر پولیس کے ڈی ایس پی سندیپ بھٹ اپنی ٹیم کے ساتھ سونی پت پہنچے، تینوں ملزمین کو عدالت میں پیش کیاگیا جہاں سے ٹرانزٹ ریمانڈ پر لے کر تینوں کو جموں وکشمیر لے گئے۔
پولیس کے مطابق نومبر2021کو جموں وکشمیر میں دو دہشت گرد محمد پرویز اور عمر فاروق پکڑے گئے تھے، ان دونوں سے پولیس نے تقریباً 43لاکھ روپے برآمد کیے تھے، پولیس پوچھ تاچھ میں پتہ چلا کہ وہ جیش محمد کے دہشت گرد عاشق نین گری کے لیے کام کرتے تھے، اسے یہ پیسے امرتسر میں نامعلوم مدد گار نے نومبر میں دئے تھے۔ پولیس تحقیقات میں نامعلوم مدد گار کی شناخت روی اور اس کی اہلیہ وریندر دیپ کور کے طور پرہوئی تھی۔ ملزمین کے بارے میں ان پٹ ملنے کے بعد ہی روی اور اس کی اہلیہ کا موبائل فون بند ہوگیا تھا، اسی درمیان پولیس کو ان کے ساتھی کا نمبر ملا، جس کا نام کنبھ تھا، اس موبائل نمبر کی لوکیشن جی ٹی روڈ پر دہلی کی طرف ملی تھی جس کے بعد سونی پت سی آئی اے ٹیم کی مدد سے تینوں کو گرفتار کرلیاگیا۔ ملزمین فتح آباد سے بنائے گئے فرضی پاسپورٹ سے دہلی جارہے تھے، وہاں سے بیرون ملک بھاگنے کی فراق میں تھے۔ سونی پت ایس پی راہل شرما نے اس کی جانکاری دیتے ہوئے بتایاکہ دہشت گردوں کے تینوں معاونین کو قابو کیا گیا، انہیں جموں وکشمیر پولیس کو سونپ دیاگیا ہے۔
