’دھوکہ‘ دینے والی بی جے پی کوانتخاب میں سزا دینے کی سنیکت کسان مورچہ کی اپیل

نئی دہلی :(ایجنسی)

سنیکت کسان مورچہ بی جے پی کے خلاف اترپردیش، اتراکھنڈ اور پنجاب میں زوردار مہم شروع کر چکی ہے۔ اب سنیکت کسان مورچہ کے تئیں وفاداری رکھتے ہوئے مختلف فارم یونینوں نے بھی اترپردیش اور اتراکھنڈ کے ووٹروں سے کسانوں کو ’دھوکہ‘ دینے والی بی جے پی کو آئندہ اسمبلی انتخاب میں سزا دینے کی اپیل کی ہے۔ اپیل میں سنیکت کسان مورچہ لیڈروں نے کہا ہے کہ ’’مشن یوپی کو بی جے پی کے خلاف چلایا جائے گا، کسی اور پارٹی کے حق میں نہیں۔‘‘ کسانوں کی بی جے پی کے تئیں بڑھتی ہوئی ناراضگی کو دیکھ کر ایسا لگ رہا ہے جیسے وہ اتر پردیش کے وزیر اعلیٰ یوگی کی ’گرمی‘ ختم کرنے کے لیے پرعزم ہیں۔

بھارتیہ کسان یونین کے لیڈر راکیش ٹکیت کا کہنا ہے کہ ’’اس کسان مخالف بی جے پی حکومت کو انتخاب میں سزا دینے کی ضرورت ہے۔ مرکزی بجٹ میں کسان مرکوز پالیسیاں، یوپی کے گنا کسانوں کو ادائیگی میں تاخیر اور آوارہ مویشیوں کے مسائل جیسے ایشوز شامل نہیں ہیں۔‘‘ انھوں نے کہا کہ ’’جب وہ آپ کا ووٹ مانگنے آتے ہیں تو ان سے پوچھیں کہ انھوں نے ان ایشوز پر کسانوں کے ساتھ دھوکہ کیوں کیا ہے۔‘‘

سنیکت کسان مورچہ مغربی اتر پردیش میں ایک پمفلٹ تقسیم کر رہا ہے جو مورچہ کی بی جے پی مخالف مہم کا انتہائی اہم حصہ ہے۔ اس پمفلٹ میں کہا گیا ہے کہ ’’بی جے پی حکومت سچ اور جھوٹ کا مطلب نہیں سمجھتی ہے، یہ آئینی اور غیر آئینی کے درمیان کا فرق نہیں جانتی ہے۔ یہ پارٹی صرف ایک زبان سمجھتی ہے – ووٹ، سیٹ، اقتدار۔‘‘

سنیکت کسان مورچہ میں شامل تنظیموں کے یوپی ریاستی یونٹس نے بھی ووٹروں کو ڈرانے کے لیے دولت اور طاقت کے استعمال کا ایشو اٹھایا۔ اکھل بھارتیہ کسان سبھا کے جنرل سکریٹری حنان ملا نے کہا کہ ’’57 یوپی کی تنظیموں نے انتخاب سے پہلے کسی کو بھی پیسے بانٹنے سے روکنے کے لیے گاؤں میں ایک گارڈ رکھنے اور کسی بھی مجرم کو پولیس کو سونپنے کا فیصلہ کیا ہے۔‘‘ سنیکت کسان مورچہ نے انتخاب سے پہلے اتر پردیش کے 9 اہم شہروں میں پریس کانفرنس کرنے کا منصوبہ بنایا ہے۔