نئی دہلی :(ایجنسی)
مرکزی وزیر برائے اقلیتی امور مختارعباس نقوی نے کرناٹک میں حجاب کے معاملے کو لے کر کانگریس لیڈر راہل گاندھی کو نشانہ بنایا ہے۔ مختار عباس نقوی نے کہاکہ راہل گاندھی حجاب کے معاملے کو لے کرسیاست کررہے ہیں ۔انہوں نے راہل گاندھی پر حجاب مسئلہ کو فرقہ وارانہ رنگ دینے کا الزام لگایا ۔
واضح رہے کہ کرناٹک میں کالج کی جانب سے مسلم طالبات کو حجاب پہننے پرکالج میں داخل نہیں ہونے دینے کے معاملہ میں کانگریس کے سابق صدر راہل گاندھی نے رد عمل ظاہر کرتے ہوئے کہا تھا کہ حجاب کے نام پر ہندوسان کی ان بیٹیوں کے ساتھ ایسا نہیں ہونا چاہئے۔راہل گاندھی نے ٹوئٹ کیا، ’’طلبا کی تعلیم کی راہ میں حجاب کو حائل کر کے ہم ہندوستان کی بیٹیوں کے مستقبل پر ڈاکہ ڈال رہے ہیں۔ ماں سرسوتی سبھی کو تعلیم سے آراستہ کرتی ہیں، وہ کسی میں امتیاز نہیں کرتیں۔‘‘
حال ہی میں کرناٹک کے وزیر تعلیم بی سی ناگیش نے حجاب تنازع پر کہا تھا کہ طالبات کو حجاب پہننے کی اجازت دے کر اسکولوں کو میدان جنگ نہیں بننے دیا جائے گا۔ ان کا کہنا تھا کہ اسکول مقدس مقام ہے اور یہ ضروری ہے کہ یہاں پر سب کو برابری کا احساس ہو۔ انہوں نے کہا کہ ان کا موقف صاف ہے، یہ سب تعلیمی اداروں میں نہیں چلے گا۔
