لکھنؤ:(ایجنسی)
اترپردیش اسمبلی انتخابات کے دوسرے مرحلے کے تحت پیر کو 55سیٹوں پر جاری ووٹنگ میں صبح11 بجے تک 23.03 فیصدی رائے دہندگان نے اپنی حق رائے دہی کا استعمال کیا ہے۔ الیکشن کمیشن سے موصول اطلاع کے مطابق سبھی نو اضلاع میں ٹھند کی پرواہ نہ کرتے ہوئے رائے دہی کے تئیں لوگوں کا جوش دیکھا جا رہا ہے۔
الیکشن کمیشن سے موصول اطلاع کے مطابق ضلع مرادآباد کی تمام اسمبلی سیٹوں کا اوسط ووٹنگ فیصد 25.99 فیصدی ہے جو کہ سب سے زیادہ ہے، جبکہ ضلع بریلی کے تمام اسمبلی سیٹوں پر ہوئی ووٹنگ کا اوسط فیصد 20.99 ہے جو کہ سب سے کم ہے۔ اس کے علاوہ سہارنپور میں 25.26 فیصدی، بجنور میں 24.34 فیصدی، سنبھل 22.95 فیصدی، رامپور میں 21.76 فیصدی، امروہہ میں 22.99 فیصدی، بدایوں میں 21.87 فیصدی، شاہجہاں پور میں 21.58 فیصدی رائے دہندگان نے اپنی حق رائے دہی کا استعمال کیا ہے۔
کندرکی اسمبلی حلقے کے نگلہ گاؤں کے رائے دہندگان نے ووٹنگ کا بائیکاٹ کیا
ضلع مرادآباد کے کندرکی اسمبلی حلقے کے نگلہ گاؤں کے رائے دہندگان نےعلاقے میں ترقیاتی کام نہ ہونے کی وجہ سے ووٹنگ کے بائیکاٹ کا اعلان کیا ہے۔ بریلی، امروہہ اور سہارنپور کے کچھ پولنگ بوتھوں پر ای وی ایم میں خرابی کی وجہ سے ووٹنگ میں تاخیر کی بھی اطلاعات ہیں۔ رپورٹ کے مطابق ضلع بریلی کے بوتھ نمبر 426 اور 429 پر ای وی ایم میں خرابی کی وجہ سے تقریبا ایک گھنٹے کی تاخیر سے ووٹنگ کا آغاز ہوا۔
ایڈیشنل سی ای او بی ڈی آر تیواری کے مطابق ووٹنگ تمام حلقوں میں پرامن طریقے سے جاری ہے۔ سبھی نو اضلاع میں ٹھند کی پرواہ نہ کرتے ہوئے رائے دہی کے تئیں لوگوں کا جوش دیکھا جارہا ہے۔ ووٹنگ طے شدہ وقت کے مطابق صبح سات بجے شروع ہوگئی جو شام چھ بجے تک جاری رہے گی۔ اس دوران قطار میں کھڑے لوگوں کو چھ بجے کے بعد بھی ووٹنگ کا موقع دیا جائے گا۔
