کیف :(ایجنسی)
روسی اور یوکرین کے درمیان جنگ میں تباہی ہر طرف دکھائی دے رہی ہے۔ اس درمیان یوکرین کے صدر ولادمیر زیلینسکی نے دعویٰ کیا ہے کہ ماسکو کے ذریعہ حملہ کیے جانے کے بعد پہلے چھ دنوں میں 6000 روسیوں کی موت ہو چکی ہے۔ ولادمیر زیلینسکی کسی بھی حال میں پیچھے ہٹنے کو تیار نہیں ہیں اور انھوں نے روس کے ساتھ آخر دم تک جدوجہد کرنے کا عزم ظاہر کیا ہے۔ یوکرین کے صدر نے اپنے تازہ بیان میں یہ بھی کہا ہے کہ روس بم اور ہوائی حملوں کے ذریعہ یوکرین پر قبضہ نہیں کر پائے گا۔
بابین یار پر روسی حملے کا تذکرہ کرتے ہوئے یوکرین کے صدر نے کہا کہ یہاں کیا گیا حملہ ثابت کرتا ہے کہ روس میں کئی لوگوں کے لیے ہمارا کیف بالکل غیر ملکی حصے کی طرح ہے۔ انھوں نے کہا کہ ان لوگوں کو کیف کے بارے میں کچھ بھی نہیں معلوم ہے۔ انھیں ہماری تاریخ کی جانکاری نہیں ہے۔ ان لوگوں کو صرف حکم ہے کہ یہ ہماری تاریخ، ہمارے ملک اور ہم سب کو مٹائیں۔
واضح رہے کہ روس اور یوکرین کے درمیان جاری جنگ میں مختلف ممالک کے لوگ بھی پھنس گئے ہیں۔ ہندوستان کے ہزاروں افراد کیف اور دیگر مقامات پر پھنسے ہوئے ہیں۔ یکم مارچ کو ایک ہندوستانی طالب علم نوین کمار کی موت بھی ہو گئی، جس کے بعد ملک میں تشویش کا عالم ہے اور وہاں پھنسے طلبا و دیگر افراد کو جلد سے جلد وطن واپسی کی کوششیں جاری ہیں۔ کچھ پروازیں طلبا کو لے کر ہندوستان واپس بھی آ چکی ہیں۔
