اسلام آباد:(ایجنسی)
28 مارچ کو پاکستان کی قومی اسمبلی میں عدم اعتماد کی تحریک کا سامنا کرنے سے پہلے وزیراعظم عمران خان کا اعتماد متزلزل ہوتا دکھائی دے رہا ہے۔ وہ تین اتحادیوں اور ان کی اپنی پارٹی پاکستان تحریک انصاف کے متعدد اراکین اسمبلی کی بغاوت کے بعد مشکل میں ہیں۔ اپوزیشن کا کہنا ہے کہ ان کے پاس اکثریت نہیں ہے۔ پاکستان کے وزیر داخلہ شیخ رشید نے انتخابات کا عندیہ دے دیا ہے۔
تحریک عدم اعتماد پر ووٹنگ سے قبل عمران خان نے ایک بار پھر اپوزیشن پر حملہ کردیا۔ انہوں نے اپوزیشن کو ڈاکوؤں کا ٹولہ قرار دیا ہے۔ انہوں نے اپوزیشن پر ہارس ٹریڈنگ یعنی ایم پیز کو خریدنے کا بھی الزام لگایا۔ وزیراعظم عمران خان نے پاکستان کی پارلیمنٹ میں تحریک عدم اعتماد سے قبل 27 مارچ کو اسلام آباد میں اپنی طاقت دکھانے کا فیصلہ کیا ہے۔ عمران آج ایک جلسہ کر رہے ہیں، جس میں عوام سے کثیر تعداد میں شرکت کی اپیل کی گئی ہے۔ عمران خان نے پاکستانی عوام سے اپیل کی ہے کہ وہ 27 مارچ کو ان کے ساتھ نکلیں۔
دوسری جانب پاکستان کے وزیر داخلہ شیخ رشید نے قومی اسمبلی میں فلور ٹیسٹ سے قبل ہی الیکشن میں جانے کا عندیہ دے دیا ہے۔ ادھر اپوزیشن کا دعویٰ ہے کہ عمران حکومت کو معلوم ہے کہ اس کے پاس اکثریت نہیں ہے اس لیے وہ تحریک عدم اعتماد کو موخر کر رہی ہے۔ راشد نے جمعرات کو کہا کہ پاکستان میں جلد انتخابات ہو سکتے ہیں۔ ان کا یہ بھی دعویٰ ہے کہ عمران خان تحریک عدم اعتماد پر اپوزیشن کو ووٹنگ میں شکست دیں گے۔
وزیراعظم عمران خان نے عوام سے اپیل کرنے کے لیے ایک ویڈیو جاری کیا ہے۔ اپنے پیغام میں انہوں نے کہا کہ ’اس ملک میں ڈاکوؤں کا ٹولہ ہے جو 30 سال سے ملک کو لوٹ رہا ہے۔ کرپشن کر رہا ہے، ملک سے باہر پیسہ بھجوارہا ہے۔ وہ اکٹھا ہوگیا ہے۔ یہ گروہ متحد ہو کر عوام کے نمائندوں یعنی ایم پیز کو خرید رہا ہے۔ ان کا پیسہ لگایا جارہاہے۔ کھلے عام خریدا جا رہا ہے۔
