اسلام آباد :(ایجنسی)
ملک کے 23 ویں وزیر اعظم کے آج ہونے والے انتخاب کیلئے قومی اسمبلی اجلاس قائم مقام اسپیکر قاسم سوری کی زیر صدارت جاری ہے، اجلاس کے آغاز میں ڈپٹی اسپیکر نے غیر ملکی مراسلہ ایوان میں لہرا دیا اور کہا کہ یہ میں چیف جسٹس پاکستان کو قومی اسمبلی کی جانب سے سیل کرکے بھیج رہا ہوں ۔
پی ٹی آئی اراکین نے بائیکاٹ کرتے ہوئے اسمبلی سے استعفیٰ دینا شروع کر دیئے ہیں۔ اجلاس شروع ہونے سے قبل متحدہ اپوزیشن کے امیدوار شہباز شریف اور پیپلز پارٹی کے چیئرمین بلاول بھٹو زرداری پارلیمنٹ ہاؤس پہنچے۔ ایوان میں آمد کے بعد پی پی چیئرمین بلاول بھٹو نے ایاز صادق سے ملاقات کی اور آج کے اجلاس کی کارروائی پر تبادلہ خیال کیا۔
پارلیمنٹ ہاؤس آمد کے موقع پر ایک صحافی نے سابق صدر آصف زرداری سے سوال کیا کہ سنا ہے صدر عارف علوی آج مستعفی ہو رہے ہیں؟ جواب میں آصف زرداری بولے میں نے نہیں سنا ایسا کچھ۔
اپوزیشن اور اتحادیوں کے پاس مطلوبہ172 سے 4 زائد ارکان کی حمایت موجود ہے، اپوزیشن پی ٹی آئی کے منحرف ارکان سے ووٹ نہیں لے گی۔ شاہ محمود قریشی کو ووٹ نہ دینے والے منحرف پارٹی رکن پر ڈی فیکشن کلاز لگ سکتی ہے۔
پی ٹی آئی ارکان قومی اسمبلی نے استعفے دینے شروع کردیئے
سابق وزیر اعظم عمران خان نے قومی اسمبلی سے استعفیٰ دینے کا فیصلہ کرلیا ہے، ان کا کہنا تھا کہ ہم کسی صورت اس اسمبلی میں نہیں بیٹھیں گے۔ عمران خان کی ہدایت کے بعد پی ٹی آئی ارکان قومی سمبلی نے استعفیٰ دینے شروع کر دیئے ہیں۔
علی زیدی نے قومی اسمبلی رکنیت سے استعفیٰ دے دیا ہے، ٹوئٹر پر اپنے استعفے کی تصویر شیئر کرتے ہوئے انہوں نے لکھا کہ میں نے اپنا استعفیٰ چیئرمین پی ٹی آئی کو جمع کرا دیا ہے۔ علی زیدی کا کہنا تھا کہ پاکستان کی خود مختاری کا فیصلہ اب عوام سڑکوں پر کریں گے، لٹیرے نہیں۔
فرخ حبیب نے بھی قومی اسمبلی کی رکنیت سے بطور احتجاج استعفیٰ دیدیا ہے۔ٹوئٹر پر اپنے استعفے کا عکس شیئر کرتے ہوئے انہوں نے لکھا ہے کہ امپوٹڈ حکومت نامنظور، میں نے مستعفی ہونے کا فیصلہ کیا ہے۔ ان کا کہنا تھا کہ یہ قومی اسمبلی کی نشست عمران خان کی امانت ہے جو فیصل آباد کے میرے حلقہ کے لوگوں نے 2018ء میں میرے سپرد کی تھی۔ فرخ حبیب نے کہا کہ پاکستان کی سالمیت،خود مختاری اور قومی غیرت کے لیے ایسی ہزاروں نشستیں قربان۔
عمران خان کا پیروکار ہونے پر فخر ہے، علی امین گنڈا پور
علی امین گنڈا پور نے بھی اپنا استعفیٰ ٹوئٹر پر شیئر کردیا۔ ٹوئٹر پیغام میں علی امین گنڈا پور کا کہنا تھا کہ مجھے عمران خان کا پیروکار ہونے پر فخر ہے۔ انہوں نے کہا کہ پاکستان اور پارلیمنٹ کی بیرونی اثرات اور امپورٹڈ حکومت کے ایجنٹوں اور مافیاز سے آزادی کے لیے مرتے دم تک لڑوں گا، ان شاء اللّٰہ
