نئی دہلی :
ویلفیئر پارٹی آف انڈیا بی جے پی لیڈر اور لکش دیپ کے ایڈمنسٹریٹر پر فل پٹیل کے تحکمانہ اقدامات اور فیصلوں کی سخت الفاظ میں مذمت کر تی ہے اور مطالبہ کر تی ہے کہ انھیں فی الفو ر عہدہ سے برطرف کرے۔
ویلفیئر پارٹی کے قومی صدر ڈاکٹر سید قاسم رسول الیاس نے اپنے پریس بیان میں کہا کہ جزیرہ لکش دیپ پر ایڈمنسٹریٹر کے ذریعہ ان غیر دستوری، یکطرفہ، ظالمانہ اور غیر اخلاقی پالیسیوں کے نفاذ کو شدید تشویش کی نگاہ سے دیکھتے ہیں۔انہوں نے کہا کہ ایڈمنسٹریٹر کے ذریعہ جزیرہ میں جہاں جرائم کی شرح نہیں کے برابرہے غنڈہ قانون(Anti Social Activities Regulation Bill 2020) لانے کی کوشش دراصل عوام کی جانب سے حکومت کے غیر قانونی و غیر دستوری فیصلوں پر کسی ممکنہ ردعمل کو سختی سے کچلنے کی تیاری ہے۔
ڈاکٹر الیاس نے ایڈمنسٹریٹر کے ذریعہ لائے جارہے ایک دوسرے قانون- (Lakshadweep Development Authority Regulation 2021) پر سخت اعتراض کر تے ہوئے کہا کہ اس قانون کے ذریعہ انتظامیہ جزیرہ کے باشندوں کی جائیدادوں سے انھیں بے دخل کر نا چاہتی ہے۔اسی طرح پنچایتوں کے انتخابات کے لیے بنائے گئے ضابطوں، جس کے تحت کسی بھی ایسے شخص کو جس کے دو سے زائد بچے ہوں پنچائت کے انتخابات میں حصہ لینے کی اجازت نہیں ہو گی ،غلط اور ظالمانہ ہے۔اسی طرح ایک ایسی یو نین ٹیریٹری جس کی اکثریت(97 فیصد)مسلمانوں پر مشتمل ہے، سیاحوں کو رجحانے کے لیے شراب کی دکانوں کے پر مٹ دئے جارہے ہیں، حالانکہ یہاں پر اب تک شراب کی خرید فروخت پر پابندی تھی۔گائے کے ذبیحہ اور دوپہر کے کھانے میں گوشت، مچھلی وغیرہ پر پابندی دراصل ایک خاص طبقہ کی غذا اور معیشت کو متاثر کر نے کی دانستہ کوشش ہے۔
ڈاکٹر الیاس نے ملک کے عوام بالخصوص سیاستدانوں اور دانشوروں سے اپیل کی کہ مودی حکومت کے ان ظالمانہ اور فرقاوارانہ اقدامات کے خلاف وہ آواز اٹھائیں اور لکش دیپ کے امن پسند اور شریف الطبع افراد کی حمایت میں آگے آئیں۔
