جامعہ ہمدرد میں کرنل طاہر مصطفیٰ کا بطور رجسٹرار تقرر

نئی دہلی، 26 جولائی کرنل طاہر مصطفیٰ کو  جامعہ یونیورسٹی کا نیا رجسٹرار مقرر کیا گیا ہے۔ انہوں نے 26 جولائی 2025 کو ڈاکٹر سرفراز احسن، رجسٹرار (آفیشیٹنگ) سے عہدہ سنبھالا۔
کرنل طاہر مصطفیٰ ایک تجربہ کار منتظم اور ہندوستانی مسلح افواج کے ایک باصلاحیت افسر کے طور پر بڑے پیمانے پر جانے جاتے ہیں۔ وہ اپنی ایمانداری، قیادت اور انتظامی صلاحیتوں کے لیے مشہور ہیں ـ  انہوں نے حکومت ہند میں کئی اہم عہدوں پر فائز رہ کر خدمات انجام دی ہیں۔ حال ہی میں، انہوں نے وزارت دفاع (آرمی)، حکومت ہند کے IHQ میں سینٹر فار آٹومیٹڈ ملٹری سروے (CAMS) میں ڈائریکٹر کے طور پر خدمات انجام دیں۔ وہ بین الاقوامی سرحدی ڈائریکٹوریٹ کے ڈائریکٹر اور وزارت خارجہ (MEA) میں باؤنڈری سیل کے سربراہ کے عہدے پر بھی فائز رہے۔ اس سے قبل، وہ ADG ملٹری سروے، نئی دہلی میں ڈائریکٹر (ایڈمنسٹریشن اینڈ ٹریننگ) اور بہار جیو اسپیشل سینٹر، پٹنہ کے ڈائریکٹر تھے۔ ان کے ابتدائی اسائنمنٹس میں ہند-نیپال سرحد پر سروے فیلڈ انچارج اور سکم میں مشرقی سرحد پر ٹاسک فورس کمانڈر کے طور پر خدمات انجام دینا شامل ہے۔ انہوں نے مرکزی، ریاستی اور نیم فوجی دستوں کی اعلیٰ ایجنسیوں کے ساتھ بڑے پیمانے پر کام کیا ہے۔
ان کی شاندار خدمات کے اعتراف میں، کرنل طاہر مصطفیٰ کو 2007 میں ہندوستان کے سابق چیف آف آرمی اسٹاف، جنرل وی کے سنگھ کی جانب سے سکم میں ٹاسک فورس کمانڈر کے طور پر ان کے مثالی کام پر توصیفی سند سے نوازا گیا۔تعلیمی لحاظ سے، انہوں نے علی گڑھ مسلم یونیورسٹی سے سول انجینئرنگ میں بی ٹیک، مدراس یونیورسٹی سے جغرافیہ میں ایم ایس سی کی ڈگریاں حاصل کی ہیں، اور انہوں نے اسٹریٹجک اہمیت کے مختلف بنیادی اور ایڈوانس کورسز مکمل کیے ہیں۔
جامعہ ہمدرد کے تدریسی اور غیر تدریسی عملے نے کرنل طاہر مصطفیٰ کو ان کی تقرری پر تہہ دل سے مبارکباد پیش کی۔ انہوں نے اعتماد کا اظہار کیا کہ ان کا وسیع انتظامی تجربہ اور قیادت جامعہ ہمدرد کی ترقی، فروغ اور بہترین کارکردگی میں نمایاں کردار ادا کرے گی۔*پریس ریلیز