ہلدوانی میں مویشی کی باقیات ملنے پر اقلیتی کمیونٹی کی دکانوں ودیگر املاک میں توڑپھوڑ، پولیس فورس تعینات

نینی تال کے ہلدوانی میں ایک مندر کے قریب ایک اسکول کے گیٹ پر ایک بچھڑے کا سر ملنے کی افواہوں کے بعد، اتوار کی رات ایک ہجوم نے علاقے میں دکانوں اور دیگر املاک کی توڑ پھوڑ کی۔ پیر کو کشیدہ شہر میں پولیس کی بھاری نفری دیکھی گئی۔انڈین ایکسپریس نے یہ رپورٹ کیا ہے
پولیس کے مطابق، ہلدوانی کے بنبھول پورہ میں ایک جانور کی باقیات کی مبینہ دریافت کے بعد اتوار کی رات ایک گروپ اکٹھا ہوا۔رویندر گپتا نے ایک نامعلوم شخص کے خلاف شکایت درج کرائی تھی۔ تاہم، پولیس اہلکاروں نے کہا کہ انہیں سی سی ٹی وی کیمروں سے پتہ چلا ہے کہ ایک کتے کو جنگل کی طرف سے جانوروں کی باقیات لاتے ہوئے دیکھا گیا ہے۔ پولیس نے بتایا کہ ابتدائی طور پر، مقامی تحقیقات سے پتہ چلتا ہے کہ جنگل کے علاقے میں ایک جانور کی پیدائش کے بعد، لاش کے حصوں کو باہر گھسیٹ لیا گیا تھا۔ پولیس نے باقیات کو فرانزک یونٹ کے ذریعے مزید جانچ اور کارروائی کے لیے لے لیا ہے۔اس کے باوجود سوشل میڈیا پر اس دریافت کی خبر پھیلتے ہی لوگوں کی بھیڑ جمع ہوگئی۔ انہوں نے شہر کے مختلف علاقوں میں اقلیتی کمیونٹی کی ملکیتی دکانوں اور دیگر املاک کی توڑ پھوڑ کی۔ پولیس نے لاٹھی چارج کیا اور ہجوم کو منتشر کردیا۔
پولیس سپرنٹنڈنٹ، کرائم، جگدیش چندرا نے انڈین ایکسپریس کو بتایا کہ بی این ایس ایس کی دفعہ 172 کے تحت اتوار کی رات سات لوگوں کو احتیاطی حراست میں رکھا گیا تھا۔ "ہم بھیڑ کی شناخت کر رہے ہیں اور جلد ہی گرفتاریاں کر لیں گے۔ لاش کا سراغ لگانے کے لیے بھی تفتیش جاری ہے،” افسر نے کہا۔ ایس پی نے کہا کہ فی الحال، شہر میں تین ڈپٹی سپرنٹنڈنٹ آف پولیس، آٹھ تھانوں کے افسران اور صوبائی آرمڈ کانسٹیبلری کی دو کمپنیاں ہیں۔