"بھارت میں بھی نیپال اور بنگلہ دیش جیسے آندولن ہوں، حکمرانوں کوسڑکوں پر دوڑا کر پیٹا جائے”؛ ابھے چوٹالہ کے بیان سے ہنگامہ

انڈین نیشنل لوک دل (INLD) کے قومی صدر ابھے سنگھ چوٹالا نے ایک متنازع بیان دے کر سیاسی ہنگامہ کھڑا کر دیا ہے، جس میں انہوں نے کہا کہ بھارت میں بھی سری لنکا، بنگلہ دیش اور نیپال کی طرز پر نوجوانوں کی قیادت میں عوامی تحریکیں چلنی چاہئیے، تاکہ موجودہ حکومت کو اقتدار سے ہٹایا جا سکے۔ میڈیا رپورٹس کے مطابق سوشل میڈیا پر وائرل ایک ویڈیو میں ابھے چوٹالا کو یہ کہتے ہوئے سنا جا سکتا ہے :

’’جس طرح سری لنکا میں ہوا، جس طرح بنگلہ دیش کے نوجوانوں نے حکومت کو ملک چھوڑنے پر مجبور کیا، اور جس طرح نیپال میں نوجوانوں نے حکومت کو اقتدار سے باہر کیا، ویسے ہی طریقے بھارت میں بھی اپنانے ہوں گے تاکہ موجودہ حکومت کو اقتدار سے باہر کیا جا سکے انہوں نے مزید کہا،حکمرانوں کو گدی سے کھینچ کر سڑکوں پر دوڑا کر پیٹنے کا کام کرنا پڑے گا ،انہیں دیش چھوڑنے پر مجبور کرنا ہوگا ‘‘ان کے اس بیان کے وائرل ہونے کے بعد، بھارتیہ جنتا پارٹی (BJP) کے قومی ترجمان شہزاد پوناوالا نے سخت ردعمل ظاہر کیا اور اسے آئینی نظام اور جمہوری اقدار کے لیے خطرہ قرار دیا۔
پوناوالا نے ایک ویڈیو پیغام میں الزام لگایا کہ اپوزیشن رہنما وزیراعظم نریندر مودی پر تنقید کی آڑ میں ملک اور آئین مخالف ذہنیت اپنا رہے ہیں۔انہوں نے کہا :’’یہ لوگ صرف سیاسی فائدہ حاصل کرنے کے لیے جمہوریت اور ڈاکٹر امبیڈکر کے آئین کے خلاف جانے کو تیار ہیں۔ یہ بیانات بھارت کے جمہوری نظام پر عوام کے اعتماد کو کمزور کرتے ہیں۔‘‘