لکھنؤ :(ایجنسی)
ملک کے وزیر داخلہ امت شاہ نے جمعہ کو لکھنؤ میں یوپی کے انتخابی مشن کا آغاز کیا۔ انہوں نے ہندتوا ، قوم پرستی اور ترقی کےمسائل کو اٹھاتے ہوئے اپوزیشن پر چوطرفہ حملہ بولا اوربی جے پی کارکنوں سے متحرک ہونے کی اپیل کی۔ اکھلیش یادو پر براہ راست حملہ کرتےہوئے امت شاہ نے کہاکہ یہ پردیش مہاتما بدھ کی کرم بھومی ہے ۔ بھگوان شیو کی کاشی کی سرزمینہے ،لیکن کئی برسوں سے لوگوں کو یہ احساس نہیں ہوتا تھا۔ مغلوں کے دور حکومت سے لے کر 2017 تک ایسامحسوس نہیں ہوتا تھا۔ 2017 میں جب بی جے پی کی مکمل اکثریت والی حکومت آئی تو اس نے یوپی کو اس کی اصل شناخت دلائی ۔
امت شاہ نے کہا کہ بی جے پی نے یوپی کو ملک کی اہم ریاستوںکی قطار میں لانے کا کام کیا ہے ۔ بی جے پی نے یہ ثابت کیا ہے کہ سرکاریں کسی پریوار کے لیے نہیں بلکہ غریب سے غریب شخص کےفلاح وبہبود کےلیے ہوتی ہیں۔ ریاست میں بی جے پی کے انتخابی مسائل کی ٹون سیٹ کرتے ہوئے امت شاہ نے کہا کہ گزشتہ 5 سالوں میں جو لوگ گھر پہنچ گئے تھے۔ وہ نئے کپڑے پہن کر آگئےہیں کہ ہماری سرکار بنےگی۔ میں ایک حساب اکھلیش جی سے مانگنا چاہتاہوں کہ آپ 5 سالوں میں بیرون ملک کتنے دن رہے۔ یوپی میں کورونا آیا اور سیلاب آیا تو آپ کہاں تھے۔ ان لوگوں نے حکومت اپنے لیے اور پریوار کے لیے کیا۔ سوچ بہت بڑی ہوگئی تو ذات کے لیے کر دیا، لیکن یوگی آدتیہ ناتھ کی سرکار ریاست کے دلت، خواتین،پسماندہ اور نوجوان سمیت تمام کے لیے چلی ہے ۔
امت شاہ نے کہا کہ بی جے پی عوام کی خواہشات کے مطابق ہی منشور تیار کرتی ہے۔ انہوں نے کہا کہ یوگی آدتیہ ناتھ اور ان کی حکومت نے 90 فیصد وعدے پورے کئے ہیں۔ اتنا ہی نہیں امت شاہ نے اسٹیج سے یوگی آدتیہ ناتھ سے کہا کہ ابھی دو مہینے باقی ہیں اور آپ اسے 100 فیصد تک لے جائیں۔ بی جے پی کی رکنیت سازی مہم نومبر اور دسمبر کے مہینوں میں چلے گی۔
یوگی حکومت کے دوران امن و امان کی بہتری کا ذکر کرتے ہوئے امت شاہ نے کہا کہ ایک وقت تھا جب کیرانہ میں نقل مکانی شروع ہوگئی تھی۔ انہوں نے کہا کہ ہر ضلع میں دو یا تین مافیا ہوا کرتے تھے، لیکن اب دوربین سے دیکھنے پر بھی مافیا نظر نہیں آتےہیں۔ امت نے شاہ نے کہا کہ یوپی کےعوام نے ہمیں بھولے شنکر کی طرح آشیرواد دیا ہے۔ میں آپ کا مقروض رہوں گا۔ آپ جو بھی دیتے ہیں، اس کاتین گنا مودی جی واپس کرتے ہیں ۔ کسی کو یقین نہیں تھا کہ وہ اپنی زندگی میں ایودھیا میں رام مندر دیکھ پائیں گے۔ لیکن آپ نے دوبارہ مکمل اکثریت کی سرکار بنائی تو رام مندر بن رہا ہے ۔
اکھلیش یادو پر حملہ کرتے ہوئے امت شاہ نے کہا کہ آپ کہتے تھے کہ مندر وہیں بنائیں گے، لیکن تاریخ نہیں بتائیں گے۔ آپ کو بتانا چاہتا ہوں کہ رام مندر کی بنیاد بھی رکھ دی گئی ہے اور آپ 5000 روپے دینے سے بھی چوک گئے۔ امت شاہ نے کہا کہ پریوار وادی پارٹی اور بی جے پی میں یہی فرق ہے۔ ہمارا وعدہ تھا کہ ہم کشمیر سے آرٹیکل 370 ہٹائیں گے۔ اس کے لیے ہمارے پہلے قومی صدر شیاما پرساد مکھرجی نے بھی قربانی دی تھی۔ اب ہم نے یہ وعدہ پورا کر دیا ہے۔
اس دوران امت شاہ نے کہا کہ’’میرا پریواربی جے پی پریوار‘ کے نام سے ممبر شپ مہم کی شروعات کی۔ انہوں نے کہا کہ نومبر اوردسمبر میں یہ مہم چلے گی۔ وزیر داخلہ نے کہاکہ ہمارا ہدف ہے کہ خواتین ، نوجوانوں اجور پسماندہ سمیت تمام طبقات کو بی جےپی سے جوڑاجائے ۔
