آفتاب کے وکیل نے کہا،میڈیا کیس بگاڑدیتا ہے

نئ دہلی :اپنی گرل فرینڈ کو بھیانک طریقہ سے موت کے گھاٹ اتارنے والے آفتاب کے وکیل اویناش کمار کاتعلق بہار کے حاجی پور سے ہے لیکن وہ گزشتہ 20 سالوں سے دہلی میں مقیم ہیں۔ یہیں ان کا گھر ہے۔ دی کوئنٹ کے ساتھ بات چیت میں انہوں نے کیس اور آفتاب کے بارے میں تفصیل سے بات کی۔
ایک سوال کے جواب میں کہ کیا ان کو کیس لڑنے پر دھمکیا ملیں اویناش کمار نے کہا کہ ابھی تک ہمارے خلاف کہیں سے دھمکی کا کوئی کیس سامنے نہیں آیا ہے۔ میں اس معاملے میں سب سے یہ بھی اپیل کرنا چاہتا ہوں کہ اس قسم کا مسئلہ (خاص کمیونٹی کاہونا)نہ اٹھایا جائے۔ لیگل فیکلٹی کے ساتھی بھی ہمارے ساتھ تعاون کر رہے ہیں۔ ایسا کچھ نہیں ہے۔ اب سب کچھ ٹھیک چل رہا ہے۔”
آفتاب کے پولی گراف ٹیسٹ کرانے کے سوال پر اویناش کمار کا کہنا ہے کہ میں اس معاملے میں کچھ نہیں کہنا چاہوں گا، کیونکہ یہ پولیس کا معاملہ ہے اور پولیس اپنا کام کر رہی ہے۔ میرا کام دفاع کا ہے۔ میں اپنے دفاع کی تیاری کر رہا ہوں۔ ہاں یہ ضرور ہے کہ اگر اس میں کچھ غلط ہوا تو عدالت کے سامنے رکھوں گا۔
اور سوال پر انہوں نے کہا کہ دراصل یہ معاملہ میڈیا میں زیادہ اجاگر ہوا جس کی وجہ سے کیس کو سنبھالنا بہت مشکل ہو جاتا ہے۔ صحیح حقیقت جو سامنے آنی ہے، وہ حقیقت سامنے نہیں آسکتی۔ کچھ اور حقائق منظر عام پر آنے لگتے ہیں۔
میں روزانہ مختلف لوگوں اور ملزموں سے ملتا رہتا ہوں۔ کسی کو دیکھ کر اور باڈی لینگویج سے میں جان سکتا ہوں کہ کون کیسا ہے؟ جب میں آفتاب سے پہلی بار ملا تو میں نے پہلی نظر میں اسے ایک سادہ سا آدمی پایا۔