نئی دہلی:
ہندوستان میں کورونا وائرس کی دوسری لہر کے اثرات نے عام لوگوں پرقہر بن کر ٹوٹی ہے ۔ ایک وقت تو ملک میں ہر دن ملنے والے انفیکشن سے متاثر افراد کی تعداد 4 لاکھ تک پہنچ گئی تھی۔ وہیں اموات کی تعداد ساڑھے چار ہزار کے پار جاچکی ہے، اسے لے کر زیادہ تر اپوزیشن پارٹیوں کے لیڈروزیر اعظم مودی اور مرکز میں اقتدار سنبھال رہی بی جے پی پر حملہ آور ہے ۔ ان میں ایک نام آل انڈیا مجلس اتحاد المسلمین کے لیڈر اسد الدین اویسی کا بھی ہے ۔ ہفتہ کو ایک ٹی وی ڈبیٹ کے دوران بھی اویسی نے پی ایم مودی پر جم کر حملہ بولا، حالانکہ بی جے پی ترجمان شاہنواز حسین نے انہیں اعداد وشمار بتاتے ہوئے پلٹ وار کیا ۔
اے آئی ایم آئی ایم کے سربراہ نے کورونا سے متعلق اعدادوشمار بتاتے ہوئے کہاکہ ’آپ کو معلوم ہے کہ بھارت کے 70 گاؤں میں ہزار آبادی پر صرف 20 ویکسین لگے ہیں۔ آپ کتنا جھوٹ بولیں گے۔ 4 لاکھ لوگ مر چکے ہیں ، جو لوگ جلانہیں سکتے ، تدفین نہیں کرسکتے، وہ لوگ لاشوں کو زمین میںہی دفن کر رہےہیں ۔ وہ لاشیں کسی کے باپ، کسی کے بیٹے، کسی کی ماں کی تھیں۔ بتائے آپ سرکار کیا رہی ہے؟ مودی کی وجہ سے بھارت میں 4 لاکھ لوگ مرگئے۔‘‘
اویسی نے کہا ، ’آپ کو کچھ نہیںمعلوم! آپ کی حکومت محل میں بیٹھ کر حکومت کررہی ہے ۔آپ عوام سے بے خبرہیں۔ مودی جی خواب غفلت سے نکلیں ، حقیقت میں آئیں اگر صحیح میں پلیٹ فارم پر چائے بیچے ہیں، تو ملک کے پلیٹ فارم پر آجایئے، اپنے محل سے نکلیں ۔ آکسیجن آپ نے دیا؟ دہلی ہائی کورٹ کے کہنے پر آکسیجن دیا۔ کتنے لوگ آکسیجن کے لیے مر گئے۔ آپ ان مرنے والوں کا مذاق بنا رہے ہیں۔‘ اویسی نے کہاکہ شاہنواز حسین اور ان کی پارٹی صرف جھوٹ بولتی ہے، ہیڈ لائنس مینج کرتی ہے۔ وزیر اعظم مگر مچھ کے آنسو بھی نہیں، ناٹک کررہے ہیں۔ ان لوگوں کا مذاق اڑا رہے ہیں جو مر چکے ہیں۔
بی جے پی لیڈر اور ترجمان شاہنواز حسین نے جواب دیتے ہوئے کہا ’ میں کچھ اعداد و شماربتادوں۔ اگر میں ان اعداد و شمار پر غلط ہوں تو مداخلت کرسکتے ہیں۔ اب تک22.46کروڑ سے زیادہ ویکسین مرکز کے ذریعہ ریاستوں کو دئے جاچکے ہیں۔ ہم نے کہاکہ ددسمبر تک 216 کروڑ خوراک لگ جائیں گی۔ آپ کو اپنیا سرکار کے بیان پر بھروسہ کرنا چاہئے۔ آپ نے کہاکہ وزیر اعظم جی محل سے نکلیں، اویسی جی محل میں تو ماشاء اللہ حیدر آباد میں آپ رہتےہیں ۔ پی ایم تو غریب کا بیٹا، انہوں نے کبھی محل دیکھا ہی نہیں ، وہ خادم ہے ، لیکن اگروزیر اعظم کی کرسی پر ہے تو کیا انہیں درد نہیں ہے، درد صرف آپ کو ہے؟‘
شاہنواز حسین نے مزید کہا:’ ملک کے وزیر اعظم دیر رات تک جاگ کر اس کی پوری نگرانی کررہے ہیں ۔ وینٹی لیٹر ،آکسیجن کے انتظامات، وہ یہ سب کررہے ہیں،‘ شاہنواز حسین نے اویسی پر نشانہ سادھتے ہوئے کہا’ آپ کا بیان اور راہل گاندھی کا بیان ایک جیسا آتا ہے ۔ آپ کا اور کمل ناتھ کا بیان ایک جیسا کیوں لگتا ہے ۔ اکھلیش یادو اور آپ کا اسٹیٹمنٹ ایک جیسا کیوں لگتا ہے ؟ کم سے کم بہتی ہوئی لاشوں پر، قبرستان میں دفن ہوئی میت اور شمشان میں جن کا سنسکار ہوا ہو ، ان کے نام پر سیاسی بیان بازی اویسی صاحب نہ کریں۔ بحران میں اکثر لاکھوں لوگوں کا دل ویسے ہی دکھی ہے ، ہم نے کہاہے کہ 216 کروڑ لوگوں کو ویکسین دیں گے ، تو دیں گے۔‘
