ایردوان کے لیے خطرہ بنے استنبول کے گرفتار مئیر جیل بھیج دیے گئے،عہدے سے بھی برطرف

ترکیہ: استنبول کی عدالت نے بدھ کو حراست میں لیے گئے میئر اکرم امام اوغلو کے بدعنوانی کے الزام میں وارنٹ گرفتاری جاری کرکے جیل بھیج دیا۔
عدالتی فیصلے کے بعد ترک وزارت داخلہ نے اکرم اوغلو کو باضابطہ طور پر استنبول کے میئر کے عہدے سے بھی ہٹا دیا۔غیر ملکی خبررساں ایجنسی کے مطابق اکرم امام اوغلو پر دہشتگردی سے متعلق الزامات بھی عائد کیے گئے ہیں تاہم انہیں صرف مالی بدعنوانی سے متعلق الزامات پر گرفتار کیا گیا ہے۔ عدالتی فیصلے کے بعد اکرم امام اوغلو نے اپنے حامیوں سے  ملک گیر احتجاج کی اپیل بھی کی۔
دوسری جانب اکرم امام اوغلو کی اپوزیشن جماعت ری پبلکن پیپلز پارٹی کے صدارتی پرائمری انتخاب میں ہزاروں افراد صدارتی امیدوار کے لیے اکرم امام اوغلو کو ووٹ دینے پہنچ گئے۔
اکرم امام  کی گرفتاری کے خلاف ترکیے کے مختلف شہروں میں 4 روز سے مظاہرے جاری ہیں اور پولیس اور مظاہرین کے درمیان جھڑپوں میں 300 سے زائد افراد گرفتار ہوچکے ہیں۔