نئی دہلی:
ایودھیا مسجد ٹرسٹ-انڈو اسلامک کلچر ل فاؤنڈدین نے ایودھیا کے دھنی پور میں اپنے مجوزہ نقشے کی ڈرائنگ پیر کو ایودھیا ڈیولپمنٹ اتھارٹی کو سونپ دی ہے۔ ایودھیا فیصلہ کے تحت دھنی پور میں سپریم کورٹ کی جانب سے دی گئی 5 ایکڑ اراضی پر ایک مسجد اور دیگر سہولیات تیار کی جائیں گی۔ ٹرسٹی کیپٹن افضل احمد خان نے ایودھیا ڈیولپمنٹ اتھارٹی کے چیئرمین اور دیگر عہدیداروں سے ایک میٹنگ کی اور ایودھیا مسجد ٹرسٹ کے مجوزہ منصوبے کے بارے میں تبادلہ خیال کیا ، جس میں 300 بستروں پر مشتمل ایک سپر اسپیشیلٹی اسپتال ، ایک کمیونٹی کچن شامل ہے جوروزانہ تقریباً ایک ہزار لوگوں کو کھانا کھلائے گا۔ ایک ریسرچ سینٹر جو عظیم مجاۃد آزادی شہید مولوی احمد اللہ شاہ کے نام سے منسوب ہوگا اور ایک ایسی مسجد جس میں ایک وقت میں دو ہزارنمازی آسانی سے آسکے۔
ٹرسٹی کیپٹن افضل احمد خان نے بتایا کہ11 سیٹوں میں نقشے ایودھیا ڈیولپمنٹ اتھارٹی کے چیئرمین وشال سنگھ کے حوالے کردیئے گئے ہیں۔ نقشے کی منظوری کے لئے ٹرسٹ نے پروسیسنگ فیس کے طور پر 89 ہزار روپے بھی جمع کرا دیئے ہیں۔ ٹرسٹی کیپٹن افضل نے مزید بتایا کہ پروجیکٹ کا نقشہ سائز میں بڑا ہے اور عام نقشوں سے بہت مختلف ہے ، لہٰذا اسے آن لائن اپلائی نہیں جاسکا ہے ، اس لئے ایودھیا ڈیولپمنٹ اتھارٹی سے نقشہ کو آف لائن منظور کرنے کی درخواست کی گئی ہے۔
کیپٹن افضل نے محکمہ انکم ٹیکس کے ذریعے انڈو اسلامک کلچرل فاؤنڈیشن کو 80G ٹیکس چھوٹ کا سرٹیفکیٹ جاری نہ کرنے پر بھی گہری تشویش کا اظہار کیا ہے۔ انہوں نے کہا کہ اس کی وجہ سے ٹرسٹ کو دیئے جانے والے عطیات کو روک دیا گیا ہے اور یہ ہمارے منصوبے کو شروع کرنے میں رکاوٹ بنتا جارہا ہے۔ انہوں نے مرکزی حکومت اور وزارت مالیات سے مداخلت کی اپیل کی۔
