ایم ایس ایم ای بورڈ میں بھر دئیے گئے ’بھاجپائی‘

نئی دہلی :
حال ہی میں اعلان کردہ مائیکرو اسمال اینڈمیڈیم انٹرپرائز (MSME) بورڈ کے ممبروں کی فہرست میں آر ایس ایس اور بی جے پی سے وابستہ زیادہ تر لوگوں کو جگہ دینے کا معاملہ سامنے آیا ہے۔ یہ بورڈ پالیسی سازی میں اہم کردار ادا کرتا ہے۔ بورڈ میں 26 سرکاری ممبران شامل ہیں جبکہ 20 دیگر افراد اس صنعت کی نمائندگی کرتے ہیں۔ نئی فہرست میں بی جے پی کے متعدد عہدیدار ، پارٹی کے سابق ایم ایل اے اور آر ایس ایس سے وابستہ ممبر شامل ہیں۔
فہرست کی چھان بین کرنے سے یہ بات سامنے آئی ہے کہ اس فہرست میں تین سابق ایم ایل اے ، بی جے پی کے ایک موجودہ ایم ایل اے ، جھارکھنڈ میں بی جے پی کے اتحادی اجوسو کے ایک سابق ایم ایل اے کو بھی اس میں شامل کیا گیا ہے۔ اس فہرست میں بی جے پی کے 6 عہدیداروں اور لگھو ادیوگ بھارتیہ(LUB) کے چھ ممبروں کے نام بھی شامل ہیں۔ فکی کے دو سابق ممبران بورڈ میں رکھے گئے ہیں اور ایک ممبر کا تعلق گجرات سے ہے۔اس فہرست میں جن ناموں کا سیاست سے براہ راست تعلق ہے ان میں بہار کے بی جے پی ممبر اسمبلی کندن کمار بھی شامل ہیں۔ وشنو کمار راجو آندھرا پردیش کے بی جے پی کے سابق ایم ایل اے ہیں۔
یشویر ڈاگر 2014 میں ہریانہ سے بی جے پی کے امیدواررہ چکے ہیں۔ پروین کیشری مشرا 2009 میں کٹک سے بی جے پی کے امیدوار تھے۔ ٹینا شرما دہلی میں بی جے پی کی ترجمان ہیں۔ راشمی مشرا ، بی جے پی پوروانچل مورچہ، رابن بلکی ، بی جے پی منی پور ریاست کے خزانچی۔ راکیش گپتا ریاستی ایگزیکٹو ممبر پنجاب ، پردیپ پشکر ریاستی صدر بی جے پی مہاراشٹر کا نام شامل ہے۔