تلنگانہ : (ایجنسی)
تلنگانہ کے چیف منسٹر کے چندر شیکھر راؤ نے متنازع بیان دیتے ہوئے بی جے پی لیڈروںکی زبانیں کاٹنے کی دھمکی دی ہے۔ چندر شیکھر راؤ نے اتوار کو بی جے پی اور ان کے لیڈروں کے لئے یہ تبصرہ کیا۔
ایک پریس کانفرنس میں مودی حکومت پر حملہ کرتے ہوئے انہوں نے دعویٰ کیا کہ خام تیل کی بین الاقوامی قیمتوں کو لے کر مودی حکومت نے ملک کے عوام سے جھوٹ بولا ہے۔ انہوں نے مرکزی حکومت پر ’غیر ضروری طور پر‘ ٹیکس بڑھانے پر بھی تنقید کی۔ تلنگانہ کے وزیر اعلیٰ نے کہا کہ ’’مرکز نے پٹرول اور ڈیزل کی قیمتوں پر جھوٹ بولا ہے، 2014 میں خام تیل کی قیمت 105 امریکی ڈالر تھی اور اب یہ 83 امریکی ڈالر ہے۔ بی جے پی نے عوام سے جھوٹ بولا کہ قیمتیں بین الاقوامی سطح پر بڑھ گئی ہیں۔
مودی حکومت کی پالیسیوں پر سوال اٹھاتے ہوئے کے چندر شیکھر راؤ نے پوچھا کہ بی جے پی نے گزشتہ 7 سالوں میں کیا کیا؟ بھارت کی جی ڈی پی بنگلہ دیش اور پاکستان سے کم ہے، مرکز نے غیر ضروری طور پر ٹیکس بڑھا دیا ہے۔ اروناچل پردیش میں چین ہم پر حملہ کر رہا ہے لیکن مرکز نے کوئی کارروائی نہیں کی۔ اس دوران انہوں نے تلنگانہ بی جے پی لیڈروں کو تنبیہ کرتے ہوئے کہا کہ اگر آپ ہم پر غیر ضروری تبصرہ کریں گے تو ہم آپ کی زبان کاٹ دیں گے۔
انہوں نے اس دوران کسانوں کی تحریک کی حمایت کرنے کا بھی اعلان کیا۔ راؤ نے کہا کہ بی جے پی حکومت واضح طور پر کسان مخالف ہے۔ میڈیا سے بات کرتے ہوئے انہوں نے کہا کہ اب تک ٹی آر ایس نے مرکز سے ریاست کی مدد کی امید میں بعض مسائل پر پارلیمنٹ میں بی جے پی کی حمایت کی تھی۔ لیکن اس کے برعکس اس کے ’’مغرور‘‘ فیصلے ریاست کے ساتھ ساتھ قوم کے مفادات کے بھی خلاف ہیں۔
حضور آباد ضمنی انتخاب میں شکست پر بات کرتے ہوئے وزیراعلیٰ نے کہا کہ یہ ایک معمولی جھٹکا ہے۔ ضمنی انتخابات میں کبھی ہم جیت جاتے ہیں اور کبھی ہار جاتے ہیں۔ اس کا کوئی مطلب نہیں۔
