منی پور:
منی پور پولیس نے طنزیہ تبصرے کرنے پر راسوکا کے تحت دو صحافیوں کو گرفتار کیا ہے۔ یہ الزام لگایا گیا ہے کہ دونوں صحافیوں نے مبینہ طور پر کورونا سے بی جے پی کے ریاستی صدر ایس تیکندر سنگھ کی موت کے بعد سوشل میڈیا پر پوسٹ کیا تھا کہ کورونا کا علاج گوبر اور گائے کے پیشاب سے نہیں ہوسکتا ہے۔ اس کے بعد پولیس نے صحافی کشور چندر وانگ کھیم اورسماجی کارکن لچو مبام کے خلاف نیشنل سیکورٹی ایکٹ (راسوکا) کے تحت مقدمہ درج کیا۔ اب دونوں کو 6 ماہ جیل میں رہنا پڑے گا۔ دوسری جانب صحافیوں کے وکیل کا کہنا ہے کہ وہ اس کیس کے خلاف ہائی کورٹ میں درخواست دائر کریں گے۔
صحافی کشورچندر وانگ کھیم اور سماجی کارکن ارینڈولچومبام کے وکیل وکٹر چونگ تھم نے بتایا ہے کہ متنازع پوسٹ کرنے کے لیے دونوں کو گرفتار کیا گیا ،ن دونوں کو ضمانت بھی مل گئی ، لیکن اس سے پہلے ہی ہمارے مؤکل پر پولیس نے راسوکا کے تحت مقدمہ درج کرلیا۔ ایڈووکیٹ وکٹر چونگ تھم نے منی پور ہائی کورٹ میں اس معاملے سے متعلق اپیل کرنے کی بات کی ہے۔ وکیل کا الزام ہے کہ گرفتاری کے دوران ان کے مؤکل صحافی کشور چندر پر پولیس نے حملہ بھی کیا اور بیوی کے ساتھ مار پیٹ کی گئی ۔ وہیں لچومبا کی ماں کے ساتھ بدسلوکی کی گئی ۔
بتادیں کہ صحافی وانگ کھیم کو بی جے پی کے خلاف تنقید کرنے پر پہلے بھی دو بار گرفتار کیا جا چکا ہے ۔ گزشتے ہفتہ بی جے پی صدر کی موت کورونا سے ہوگئی تھی، دونوں صحافیوں نے فیس بک پر انہیں خراج عقیدت دیتے ہوئے لکھاکہ کورونا کا علاج گائے کے پیشا ب یا گوبر سے نہیں کیا جاسکتا ۔ صحافیوں کے اس تبصرے پر ریاستی کے بی جے پی لیڈروں نے تنقید کی تھی۔ ساتھ ہی کارروائی کی مانگ کی تھی۔
