نئی دہلی :
کورونا کے بڑھتے ہوئے کیسوں کی وجہ سے پورے ملک میں ہاہا کار مچا ہوا ہے۔ آکسیجن کی کمی کی وجہ سے مریض اسپتالوں میں دم توڑ ہے ہیں۔ کئی مریضوں کو تو اسپتال تک نصیب نہیں ہو رہا ہے ۔اترپردیش کے سابق وزیر اعلیٰ اکھلیش یادو نے کووڈ 19-کے بڑھتے وبا کو دیکھتے ہوئے لکھا ہے کہ آج بھارت کے کورونا مریضوں کے یومیہ تعداد کے 4 لاکھ عبو ر کئےجانے پر پوری دنیا میں سنگین تشویس کاا ظہار کیا ہے ۔ دنیا کے ماہرین لاک ڈاؤن کا مشورہ دے رہے ہیں لیکن بی جے پی سرکار ابھی بھی صورت حال کی شدت کو قبول نہیں کررہے ہیں اور اسے مسلسل جھوٹ بتا رہے ہیں۔
دوسری جانب دہلی کے گنگارام اسپتال میں ایک بار پھر آکسیجن کا بحران پیدا ہوگیا ہے۔ یہاں صرف 2500 مکعب میٹر آکسیجن بچی ہے جو پانچ گھنٹوں میں ختم ہوجائے گی۔
راجیو گاندھی سپر اسپیشلیٹی اسپتال میں آکسیجن کی کمی کا معاملہ سامنے آیا ہے۔ آکسیجن یہاں چند گھنٹوں میں ختم ہوجائے گی۔ اسپتال میں تقریباً 350 مریض آکسیجن پر منحصر ہیں۔
اب پانی سر سے اوپر ہوگیا ہے، مرکزی حکومت دہلی کو آج ہی 490 ٹن آکسیجن فراہم کرے: ہائی کورٹ
وہیں دہلی ہائی کورٹ نے ہفتہ کے روز مرکزی حکومت کو ہدایت دی کہ وہ دہلی کے لئے مختص 490 ٹن مائع طبی آکسیجن آج ہی فراہم کرے اور ایسا کرنے میں ناکام رہنے پر عدالت اس کے خلاف توہین عدالت کی کارروائی پر غور کر سکتی ہے۔ہائی کورٹ نے بترا اسپتال میں آکسیجن کی شدید قلت سے درخواست کی فوری سماعت کرتے ہوئے یہ سخت ہدایت دی ہے۔ سماعت کے دوران اسپتال نے عدالت کو بتایا کہ آکسیجن کی کمی کے سبب اسپتال میں اب تک آٹھ مریضوں کی موت ہوچکی ہے۔جسٹس وپن سانگھی اور جسٹس ریکھا پلی کی بنچ نے کہا کہ ہم مرکزی حکومت کو ہدایت دیتے ہیں کہ وہ کسی بھی حال میں دہلی کو 490 ٹن آکسیجن کی فراہمی آج ہی یقینی بنائے۔جسٹس سانگھی نے مرکز کی جانب سے پیش ہونے والے ایڈیشنل سالیسٹر جنرل چیتن شرما سے کہا کہ اب پانی سر سے اوپر ہوگیا ہے، اور اب بہت ہوچکا۔
جج نے کہاکہ ہم 490 ٹن سے زیادہ آکسیجن دینے کو نہیں کہہ رہے ہیں۔ آپ نے اسے مختص کردیا ہے۔ اب آپ کے اوپر واجب ہے کہ اس کی فراہمی جلد کریں۔
عدالت نے کہا کہ مرکزی حکومت نے دہلی کو روزانہ 490 ٹن میڈیکل آکسیجن مختص کیا تھا، جو صرف کاغذ پر ہے۔ دہلی کو مختص کی گئی آکسیجن ابھی تک نہیں مل سکی ہے۔
عدالت نے کہا کہ ٹینکروں کا انتظام کرنا بھی مرکز کی ذمہ داری ہے۔ بنچ نے متنبہ کرتے ہوئے کہا کہ اگر حکم کی تعمیل نہیں ہوئی تو ہم توہین عدالت کی کارروائی شروع کرنے پر غور کریں گے۔
آکسیجن کی کمی سے اسپتالوں میں ہاہاکار: کیجریوال
دہلی کے وزیراعلیٰ اروند کیجریوال نے ہفتے کے روز کہا کہ دارالحکومت میں آکسیجن کی بہت زیادہ کمی ہونے کے سبب اسپتالوں میں ہاہاکار مچا ہے۔
مسٹر کیجریوال نے سرسوتی وہار پالی کلینک کا دورہ کرنے کے بعد کہا کہ چاروں طرف اسپتالوں سے ایس او ایس کال آ رہے ہیں کہ اس اسپتال میں آکسیجن ختم ہو گئی ہے، اس میں نصف گھنٹے کی آکسیجن بچی ہے۔ بہت زیادہ مشکل حالات پیدا ہوتے جا رہے ہیں۔ ہم نے عدالت میں بھی کہا ہے اور مرکزی حکومت کو بھی لکھا ہے کہ دہلی کو یومیہ 976 ٹن آکسیجن کی ضرورت ہے لیکن ہمیں 976 ٹن کے مقابلے 490 ٹن آکسیجن الاٹ کیا گیا ہے اور ہمیں یہ 490 ٹن آکسیجن بھی نہیں مل پا رہی ہے۔
انہوں نے بتایا کہ گزشتہ روز محض 312 ٹن آکسیجن آیا ہے۔ دہلی کو 976 ٹن آکسیجن کی ضرورت ہے اور اسکے مقابلے اگر ہمیں 312 ٹن آکسیجن دی جائے گی تو کیسے کام چلے گا؟ آج سارے اسپتالوں کے اندر ہاہاکار مچا ہوا ہے۔ کئی اسپتالوں نے بولا ہے کہ انھیں اپنے مریض اسپتال سے نکالنے پڑیں گے۔ وزیراعلیٰ نے کہا کہ دہلی کو آکسیجن چاہیے۔ میری اپیل کو جو بھی سن رہا ہے اور جن جن افراد کو فیصلہ کرنا ہے، ان سبھی سے ہاتھ جوڑ کر درخواست ہے کہ ہماری دہلی کو آکسیجن چاہیے۔ ہمیں آکسیجن دیجیے۔
