نئی دہلی :
دہلی میں کورونا کی رفتار کو تھمانے کے لیے لگایا لاک ڈاؤن اب ایک ہفتہ کے لیے بڑھا دیا گیا ہے۔ سی ایم اروند کیجریوال نے اتوار کو پریس کانفرنس کرکے اس بات کی جانکاری دی۔ انہوںنے بتایا کہ دہلی میں جو لاک ڈاؤن پہلے 10 مئی کو ختم ہونا تھا اب وہ 17 مئی کی صبح تک لاگو ہوگا۔ کیجریوال نے یہ بھی کہاکہ اس بار کا لاک ڈاؤن زیادہ سخت ہوگا، تاکہ انفیکشن کی رفتار کو قابو میں کیا جا سکے۔ دہلی میں پیر سے میٹرو سروس کو بھی بند کردیا جائے گا۔
وزیراعلیٰ نے کہا کہ سب سے بڑی پریشانی دہلی میں آکسیجن کی آئی ، عام دنوں میں ، اسپتالوں میں آکسیجن کی جتنی ضرورت ہوتی ہے، اس سے کئی گنا زیادہ آکسیجن کی ضرورت پڑنے لگی۔ کیونکہ ابھی جتنے بھی مریض آرہے ہیں، ان سب کو آکسیجن کی ضرورت پڑ رہی ہے۔ گزشتہ کئی دنوں سے ہائی کورٹ اور سپریم کورٹ کے احکام سے اور مرکز سرکار کے تعاون سے دہلی میں اب آکسیجن کی صورت حال کافی بہتر ہوئی ہے۔ اب اس طرح کی باتیں سننے کو نہیں ملتیں کہ اس اسپتال میں د وگھنٹے کی آکسیجن باقی ہے۔ اس اسپتال میں آدھے گھنٹے کی آکسیجن بچی ہے۔
‘ابھی نرمی دینے کا وقت نہیں آیا
کیجریوال نے کہا کہ کورونا کیسز میں کمی آئی ہے ، لیکن ابھی بھی بہت ہیں۔ 23٪ فیصد اب بھی انفیکشن کی شرح ہے۔ ابھی نرمی دینے کا وقت نہیں آیا ہے ۔ سب کا ماننا ہے کہ لاک ڈاؤن میں مزید توسیع کی جائے۔ اس سختی کو ابھی تھوڑے دن اور برقرار رکھنے کی ضرورت ہے۔نہیں تو ہم نے جو حاصل کیا ہے وہ بھی ختم ہوجائےگا۔ یہ لہر بہت خطرناک ہے۔ لوگوں کی موت ہو رہی ہے ، اس لئے جان ہے تو جہان ہے۔ اگر زندگی بچے گی تو بعد میں اور بہت کچھ کر لیں گے۔ سب سے پہلے ہمیں زندگی بچانا ہے۔ اس لئے سرکار نے آپ سب لوگوں کے فیڈ بیک کی بنیاد پر مجبوراً ابھی ایک ہفتے کا لاک ڈاؤن مزید بڑھا دیا ہے۔ کل صبح 5 بجے لاک ڈاؤن ختم ہونا تھا لیکن اب یہ اگلے پیر 17 مئی صبح 5 بجے تک کے لیے بڑھایا جارہا ہے اس بار تھوڑا اور سخت کیاجا رہا ہے۔ کل سے دہلی کے اندر میٹرو بھی چلنا بند ہوجائے گی۔ ہماری کوشش ہے کہ لاک ڈاؤن کو جتنا سخت کیا جائے گا اتنی تیزی سے ہم سب لوگ کورونا پر قابو پائیں گے۔
اس بار کیا -کیارہیں گی پابندیاں ؟
پیر سے دہلی میں میٹرو نہیں چلے گی۔ اس کے علاوہ کسی بھی میرج ہال ، وینکٹ ہال یا ہوٹل میں شادی نہیں ہوسکے گی۔ شادی کرنے پر پابندی نہیں ہے ، لیکن شادی صرف گھر یا کورٹ میں ہی ہو سکتی ہے ۔ابھی تک شادیوں میں 50 سے زیادہ لوگوں کے شامل ہونے کی اجازت تھی لیکن اب 20 سے زیادہ لوگ جمع نہیں ہوسکتے، شادی میں ڈی جے، ٹینٹ، کٹرینگ کی بھی اجازت نہیں ہوگی۔
یوپی:17 مئی تک کرفیومیں توسیع
اتر پردیش میں بڑھتے کورونا انفیکشن کے درمیان ، یوگی حکومت نے کورونا کرفیو میں مزید 7 دن کی توسیع کردی ہے۔ اس سے قبل کرفیو 10 مئی کو ختم ہورہا تھا ، لیکن اب ریاست میں یہ پابندیاں 17 مئی تک نافذ العمل رہیں گی۔ ایڈیشنل چیف سکریٹری اطلاعات نونیت سہگل نے اس بارے میں آگاہ کیا ہے۔ انہوں نے بتایا کہ کورونا کرفیو کے دوران ضروری خدمات جاری رہیں گی۔ ریاست میں پہلے کی طرح سختی برقرار رہے گی۔
