نئی دہلی:
کورونا بحران کی دوسری لہر کی وجہ سے طلبا، ٹیچر اور والدین میں سی بی ایس ای کلاس 12 بورڈ ایگزام کو لے کر غیر یقینی صورتحال بنی ہوئی ہے۔ ذرائع کے مطابق وزیر تعلیم رمیش پکھریال نشنک یکم جون کو کلاس 12ویں بورڈ کے امتحانات کی تاریخوں کا اعلان کرسکتے ہیں۔
اس میں امتحان کی مدت ڈیڑھ گھنٹے سے کم کرکے آدھے گھنٹے کی جاسکتی ہے۔ معلومات کے مطابق طلبا کے لیے 30 منٹ کی مدت کے لیے منعقد ہونے والے امتحان میں ان سے آبجیکٹیو یعنی معروضی سوالات پوچھے جائیں گے۔
بتادیں کہ اتوار کے روز ریاستی وزرائے اعلیٰ کے ساتھ ہونے والی میٹنگ کے بعد وزارت تعلیم نے 25 مئی تک مرکز کی تجویز پر تمام ریاستوں سے تحریری طور پر رائے مانگی تھی۔ اجلاس کے دن ہی 32 ریاستوں اور مرکز کے زیر انتظام علاقوں نے سی بی ایس ای 12 ویں بورڈ ایگزام منعقد کئے جانے کی تجویز کی حمایت کی تھی۔
صرف چار ریاست دہلی ، مہاراشٹر ، گوا اور انڈومان اور نکوبار نے امتحانات نہ کرانے کی تجویز دی تھی۔ ان ریاستوں نے امتحان سے قبل طلبااور ٹیچروں کے لیے ویکسین کی مانگ اٹھائی تھی ۔ اس کے علاوہ زیادہ تر ریاستوں نے چھوٹے فارمیٹ یعنی ڈیڑھ گھنٹے (90 منٹ) کے ایگزام پر اتفاق کیا ہے ۔
ایگزام منعقد کرانے کے لیے اتفاق کرنے والی 32 میں تقریباً 29 ریاستوں اور مرکز کے زیر انتظام علاقوں نے یا تو سی بی ایس ای کے آپشن بی سے اتفاق کیا یا معاملے پر مرکز کے فیصلے کی حمایت کرنے کے لیے اتفاق کیا۔ صرف راجستھان ، تری پورہ، تلنگانہ نے آپشن A یعنی موجودہ فارمیٹ میں امتحان کرانے کی تجویز پیش کی۔
سی بی ایس ای نے کلاس 12 کے بورڈ امتحانات کے انعقاد کے لئے وزارت تعلیم کو دو آپشنز تجویز کیے تھے۔ پہلے آپشن میں طلباکے صرف 19 اہم مضامین کے پیپر لئے جانے ہیں جس میں امتحان کا فارمیٹ اور ایگزام سینٹر پہلے جیسے ہی رہیں گے۔ دوسرے آپشن میں ایگزام کا پیٹرن 3 گھنٹے سے گھٹا کر ڈیرھ گھنے کیا جانا ہے اور طلبا کو اپنے ہی اسکول میں امتحان دینے کی اجازت دی جانی ہے ۔
مرکزی وزرائے اعلیٰ کے ساتھ اعلیٰ سطحی بیٹھک کے بعد تمام ریاستوں سے ایک ہفتے کے اندر بورڈ کے امتحانات کے بارے میں اپنی تجاویز دینے کو کہا گیاتھا۔ بیشتر ریاستیں امتحانات لینے کے حق میں ہیں اور چھوٹے فارمیٹ میں امتحان دینے کو تیار ہیں۔ مرکزی وزیرتعلیم رمیش پوکھریال نشنک تمام تجاویز پر غور کرنے کے بعدیکم جون کو بورڈ امتحانات کی نئی تاریخوں کا اعلان کریں گے۔
