شام کے دارالحکومت دمشق میں ایرانی سفارتخانے پر حملے کے بعد اسرائیل نے ایران کی جانب سے ردعمل کا خدشہ ظاہر کردیا۔
اسرائیلی اخبار کا کہنا ہے کہ ایرانی ردعمل کے خدشہ کے پیش نظر اسرائیل نے ایئر ڈیفنس سسٹم ہائی الرٹ کردیا ہے۔
اسرائیلی اخبار نے کہا کہ اسرائیلی فوج نے ریزرو فوجی بھی طلب کرلیے ہیں اخبار نے اپنے بیان میں کہا کہ حزب اللّٰہ یا حوثیوں کے بجائے ایران کے براہ راست میزائل حملے کا امکان ہے۔
واضح رہے کہ اسرائیل نے شام کے دارالحکومت دمشق میں ایران کے سفارتخانے پر میزائل حملہ کیا جس میں 8 افراد جاں بحق ہوگئے، جاں بحق افراد میں سفارتکار بھی شامل تھے۔
ایرانی میڈیا نے کہا کہ اسرائیل نے دمشق میں ایرانی سفارتخانے کے قونصلر سیکشن کو حملے کا نشانہ بنایا جس سے عمارت تباہ ہوگئ
دریں اثنا یورپین یونین نے اسرائیل کی جانب سے دمشق میں ایرانی سفارتی عمارت کو نشانہ بنانے کی مذمت کرتے ہوئے کہا ہے کہ سفارت اہلکاروں اور سفارتی عمارات سے متعلق بین الاقوامی قانون کا احترام کیا جانا چاہیے۔
اس حوالے سے یورپین ایکسٹرنل ایکشن سروس کے ترجمان پیٹر سٹانو کی جانب سے جاری کردہ اعلامیے میں کہا گیا ہے کہ ‘یورپی یونین یکم اپریل کو دمشق میں ایک ایرانی سفارتی تنصیب پر حملے کے ساتھ ساتھ مبینہ ہلاکتوں کی مذمت کرتی ہے۔
ترجمان کا کہنا ہے کہ اس انتہائی کشیدہ علاقائی صورتحال میں انتہائی تحمل کا مظاہرہ کرنا ناگزیر ہے۔ خطے میں مزید کشیدگی کسی کے مفاد میں نہیں ہے۔
ترجمان نے مزید کہا کہ ‘سفارتی اور قونصلر احاطے اور عملے کے قابل تحفظ ہونے کے اصول کا ہر صورت اور تمام حالات میں بین الاقوامی قانون کے مطابق احترام کیا جانا چاہیے’۔