سرکاری کٹوتیوں کے ٹرمپ کے اقدامات سے سی آئی اے کے راز افشا ہونے کا خدشہ

امریکی صدر ڈونلڈ ٹرمپ کے سرکاری کٹوتیوں کے اقدامات سے خفیہ ایجنسی سینٹرل انٹیلی جنس ایجنسی (سی آئی اے)  کے راز افشا ہونے کا خطرہ پیدا ہو گیا ہے۔امریکی میڈیا کے مطابق فروری کے اوائل میں وائٹ ہاؤس کو ایک ای میل بھیجی گئی تھی، جس میں ممکنہ برطرفیوں کےلیے کچھ افسران کی اُن کے ناموں کے ساتھ نشاندہی کی گئی تھی۔
سی آئی اے اس بات کا اندازہ لگانے کی کوشش کر رہی ہے کہ آیا اُس ای میل کی وجہ سے انڈر کور کام کرنے والے سی آئی اے اہلکاروں کی شناخت تو لیک نہیں ہوئی۔میڈیا رپورٹ میں کہا گیا ہے کہ سی آئی اے کی اعلیٰ قیادت اس بات کا بھی جائزہ لے رہی ہے کہ بڑے پیمانے پر برطرفیاں کس طرح سابق ملازمین کے ایک ناراض گروپ کو جنم دے سکتی ہیں، جو ملک کے راز، غیر ملکی جاسوسوں اور ہیکرز کو فراہم کرنے پر آمادہ ہو سکتے ہیں اور کس طرح چین اور روس جیسی غیر ملکی انٹیلی جنس ایجنسیاں مالی مشکلات کے شکار یا ناراض سابق ملازمین کو بھرتی کر سکتی ہیں۔