یوپی کے بجنور میں  نوجوان کی تبدیلی مذہب کے الزام میں قاضی سمیت پانچ افراد جیل رسید

اتر پردیش کے بجنور ضلع سے ایک متنازعہ معاملے میں، ایک قاضی اور ایک مسلم خاتون سمیت پانچ افراد کو اتر پردیش کے غیر قانونی تبدیلی مذہب ایکٹ 2021 کے تحت گرفتار کیا گیا ہے۔
اس کیس میں ایک ہندو نوجوان مکل کی ایک مسلم خاتون صائمہ سے شادی سے قبل مبینہ طور پر جبری تبدیلی مذہب شامل ہے۔  یہ واقعہ پرانا دھام پور علاقے میں پیش آیا اور اس نے تبدیلی مذہب کے قانون کے امتیازی  اطلاق پر بحث چھیڑ دی ہے۔
پولیس کے مطابق، پرانا دھام پور کے رہنے والے جسونت سنگھ نے صائمہ اور اس کے اہل خانہ کے خلاف شکایت درج کرائی، جس میں ان پر اپنے بیٹے مکل کو زبردستی اسلام قبول کرنے کا الزام لگایا۔  سینئر سپرنٹنڈنٹ آف پولیس (ایس ایس پی) دھرم سنگھ مارچل نے بتایا کہ مکل اور صائمہ محبت ایک دوسرے سے محبت  کرتے تھے اور شادی کرنا چاہتے تھے۔
تاہم، صائمہ نے ہندو مذہب اختیار کرنے سے انکار کر دیا اور مبینہ طور پر مکل پر اسلام قبول کرنے کے لیے دباؤ ڈالا۔
جسونت سنگھ نے مزید الزام لگایا کہ صائمہ، اس کے والدین – شاہد اور رخسانہ – اور دو قاضیوں، مولانا ارشاد اور مولانا غفران نے مکل کی تبدیلی  مذہب کا منصوبہ بنایا۔  پولیس کے مطابق مکل کو ہفتے کی رات ایک مدرسے میں لے جایا گیا جہاں صائمہ سے شادی کرنے سے پہلے اس نے اسلام قبول کر لیا۔  شکایت پر کارروائی کرتے ہوئے پولیس نے اتوار کو پانچوں ملزمان کو گرفتار کر کے جیل بھیج دیا۔اتر پردیش میں غیر قانونی تبدیلی مذہب ایکٹ 2021 کے تحت ایک کیس درج کیا گیا ہے، جس میں زبردستی مذہب کی تبدیلی پر 3 سے 10 سال کی قید اور 50,000 روپے تک کے جرمانے کی تجویز ہے۔  اس کیس نے اس قانون کے نفاذ پر بحثیں تیز کر دی ہیں، جس کا زیادہ تر استعمال ہندو خواتین کے مذہب تبدیل کرنے کے الزام میں مسلمان مردوں کے خلاف کیا گیا ہے۔تاہم، ایسی مثالیں جہاں ہندو مرد شادی کے لیے اسلام قبول کرتے ہیں، ان کے خلاف شاذ و نادر ہی مقدمہ چلایا جاتا ہے۔