ہری دوار: کانوڑ یاترا روٹ کے ڈھابوں پر نام لکھ کر شناخت کا تنازعہ ابھی پوری طرح سے تھما نہیں ہے، ادھر ہری دوار میں انتظامیہ کے ایک اور فیصلے پر سوال اٹھ رہے ہیں۔ اس بار کانوڑ کے راستے پر پڑنے والی مساجد اور مقبروں کو ترپال سے ڈھانپ دیا گیا ہے۔ یہاں جوالاپور کی رام نگر کالونی میں واقع مسجد کے گیٹ اور درگا چوک کے قریب مزار پر ایک بڑا ترپال لگا دیا گیا ہے۔ تاہم، کانوڑ یاترا کے دوران اس سے پہلے کبھی بھی مسجد اور مزارکا اس طرح احاطہ نہیں کیا گیا تھا۔
انتظامیہ کے اس فیصلے سے مزار و مسجد کے متولی اور مولانا لاعلم ہیں۔ ان کا کہنا ہے کہ اس حوالے سے ان سے کوئی بات نہیں ہوئی۔ جبکہ کئی دہائیوں سے کانوڑ یہاں سے گزر رہی ہیں اور کانواڑیہ مزار کے باہر درخت کے سائے میں آرام بھی کرتے ہیں۔ پہلے یہاں لوگ چائے پانی پیا کرتے تھے۔
انڈیا ٹی وی کی رپورٹ کے مطابق مزار کے نگراں شکیل احمد نے کہا کہ وہ پچھلے 40 سالوں سے کانوڑ کو لے جاتے دیکھ رہے ہیں۔ کبھی کوئی جھگڑا نہیں ہوا۔ اس بار پہلی بار انتظامیہ نے مقبروں اور مساجد کو ڈھانپ لیا۔ پتہ نہیں ان کے ارادے کیا ہیں۔ شکیل نے کہا کہ انتظامیہ کا یہ فیصلہ درست نہیں ہے۔ دوسری انتظامی افسران اس معاملے پر بات کرنے سے گریز کر رہے ہیں۔ تاہم، کابینہ کے وزیر ستپال مہاراج کا کہنا ہے کہ مسجدوں اور مقبروں کو ڈھانپ دیا گیا ہے تاکہ یہ یقینی بنایا جا سکے کہ کانواڑ یاترا منظم طریقے سے چلتی ہے۔ کانواڑ یاترا کے دوران کوئی جوش یا غصہ نہیں ہونا چاہیے۔ اس بات کا خیال رکھا گیا ہے۔ انہوں نے کہا کہ جب کوئی تعمیراتی کام ہوتا ہے تب بھی اس کا احاطہ کیا جاتاہے