نئی دہلی ؍ایودھیا : (ایجنسی)
ایودھیا میں رام مندر کی تعمیر کو 9 نومبر 2019 کو ملک کی سپریم کورٹ کے فیصلے کے بعد منظوری ملی۔ اس منظوری کے بعد ہی ایودھیا لوگوں کی توجہ کا مرکز بن گیا ہے۔ لوگوں میں زمین خریدنے کی ہوڑ لگی ہوئی ہے۔پلاٹ خریدنےمیںمقامی ایم ایل ایز ، نوکر شاہوں کے قریبی رشتہ داربڑی تعداد میں شامل ہیں۔
دی انڈین ایکسپریس کی تحقیقات میں یہ بات سامنے آئی ہے کہ ایودھیا میں تعینات اہلکاروں سے لے کر بڑے لیڈروں تک ایودھیا میں زمین خریدنے کا مقابلہ آرائی ہے۔ رپورٹ کے مطابق ان افسران کے اہل خانہ نے سپریم کورٹ کے فیصلے کے بعد رام مندر کی جگہ کے 5 کلومیٹر کے دائرے میں زمین خریدی ۔
جس میں ایم ایل اے، میئر اور ریاستی او بی سی کمیشن کے ایک رکن ہیں۔ ڈویژنل کمشنر، سب ڈویژنل مجسٹریٹ، ڈپٹی انسپکٹر جنرل آف پولیس، سرکل آفیسر آف پولیس، اسٹیٹ انفارمیشن کمشنر کے رشتہ داروں کو ملا کر ایسے 14 معاملے پلاٹ لینے کے سامنے آئے ہیں۔
واضح رہے کہ ایودھیا میں رام مندر کی تعمیر کے بعد ایودھیا کی نوعیت بدل جائے گی۔ ایسے میں یہاں ابھی سے ہی زمین خریدنے میں لوگ تیزی دکھا رہے ہیں۔ وہیں زمین خریدنے میں مبینہ بے ضابطگیوں کے معاملے بھی منظر پر آئے ہیں۔ خاص بات یہ ہے کہ مہارشی رامائن ودیاپیٹھ ٹرسٹ (ایم آر وی ٹی) میں دلت دیہاتیوں سے زمین خرید میں جانچ انہی افسران کے ذریعہ ہو رہی ہے جن کے رشتہ داروں نے زمین خریدی ہے۔
کن لوگوںنے لی زمین :
ایودھیا کے ڈویژنل کمشنر ایم پی اگروال کے سسر کیشو پرساد اگروال نے 10 دسمبر 2020 کو برہٹا مانجھا میں ایم آر وی ٹی سے31لاکھ روپے میں 2,530مربع میٹر خریدا۔وہیں ان کے بہنوئی آنند وردھن نے بھی اسی دن اسی ایم آر وی ٹی سے 15.50 لاکھ روپے میں 1,260مربع میٹر خریدا۔ غور طلب ہےکہ کمشنر کی بیوی اپنے والد کی فرم Helmond Contractors & Builders LLP میں شراکت دار ہیں۔
تاہم اس خریداری کے بارے میں ایم پی اگروال کا کہنا ہے کہ انہیں اس بارے میں کوئی جانکاری نہیں ہے۔ ان کے سسر کیشو پرساد اگروال نے کہا، ’ہاں، میں نے یہ زمین خریدی ہے کیونکہ میں ریٹائرمنٹ کے بعد ایودھیا میں رہنے کا ارادہ رکھتا ہوں۔ اس میں شری ایم پی اگروال کا کوئی رول نہیں ہے۔
ایم ایل اے اندرپرتاپ تیواری:
ایودھیا ضلع کے گوسائی گنج کے ایم ایل اے اندرپرتاپ تیواری نے بھی 18 نومبر 2019 کو ایم آر وی ٹی سے برہٹا مانجھا میں 2,593 مربع میٹر 30 لاکھ روپے میں خریدا۔ وہیں 16 مارچ 2021 کو ان کے بہنوئی راجیش کمار مشرا نے راگھواچاریہ کے ساتھ مل کر سورج داس سے برہٹا مانجھا میں 6320 مربع میٹر 47.40 لاکھ روپے میں خریدا۔ راجیش کا کہنا ہے کہ اس زمین کی خریداری کا تیواری سے کوئی تعلق نہیں ہے۔ میں نے اپنی بچت سے یہ خریدا ہے۔
چیف ریونیو آفیسر:
20 جولالی 2018 سے 10 ستمبر 2021 تک ایودھیا کے چیف ریونیو آفیسر رہےپروشوتم داس گپتا کےسالے اتل گپتاکی بیوی ترپتی گپتانے امر جیت یادونام کے ایک شخص کے ساتھ مل کر 12 اکتوبر 2021 کو برہٹا مانجھا میں 1,130مربع میٹر ایم آروی ٹی سے 21.88لاکھ روپے میں خرید کی۔ وہیں پروشوتم داس گپتا کاکہنا ہے کہ ایم آر وی ٹی کے خلاف جانچ میں ان کا کوئی رول نہیں تھا اور انہوں نے اپنے نام پر کوئی زمین نہیںخریدی تھی۔
ڈپٹی انسپکٹر جنرل آف پولیس (ڈی آئی جی):
دیپک کمارجو 26 جولائی 2020 سے 30 مارچ 2021 تک ڈپٹی انسپکٹر جنرل آف پولیس (ڈی آئی جی) کے عہدے پر رہے، اب علی گڑھ کے ڈی آئی جی ہیں۔ ان کی بیوی کی بہن مہیما ٹھاکر نے یکم ستمبر 2021 کو ایم آر وی ٹی سے برہٹا مانجھا میں 1,020 مربع میٹر 19.75 لاکھ روپے میں خریدا تھا۔ اس پر دیپک کمار نے کہا کہ ایودھیا میں میری پوسٹنگ کے دوران میرے کسی رشتہ دار نے کوئی زمین نہیں خریدی۔ میں نے، میری بیوی یا میرے والد نے وہاں کسی زمین کے لیے کوئی رقم ادا نہیں کی۔
ایم ایل اے وید پرکاش گپتا:
ایودھیا قانون ساز اسمبلی کے ایم ایل اے وید پرکاش گپتا کے بھتیجے ترون متل نے 21 نومبر 2019 کو رینو سنگھ اور سیما سونی سے برہٹا مانجھا میں 5,174 مربع میٹر زمین 1.15 کروڑ روپے میں خریدی۔ 29 دسمبر 2020 کوانہوں نے مندر کی جگہ سے تقریباً 5 کلومیٹر دور سریو ندی کے اس پار مہیش پور (گونڈا) میں 14,860 مربع میٹر زمین جگدمبا سنگھ اور جادونندن سنگھ سے 4 کروڑ روپے میں خریدی۔
ایس ڈی ایم:
ایودھیا میں ایس ڈی ایم کے عہدے پر فائز آیوش چودھری کی چچا زاد بہن شوبھیتا رانی نے 28 مئی 2020 کو آسارام سے بیرولی ایودھیا میں 5,350 مربع میٹر 17.66 لاکھ روپے میں خریدا۔ 28 نومبر 2019 کو آراو دیشا کملا فاؤنڈیشن جسے شوبھیتا رانی چلاتی ہے، ایودھیا کے ملک پور میں 1,130 مربع میٹر دنیش کمار سے 7.24 لاکھ روپے میں خریدی۔
