نئی دہلی :
بھارت میں کووڈ کی صورت حال ہر گزرتے دن کے ساتھ خراب ہو تی جارہی ہے۔ 29 اپریل کو ملک میں ریکارڈ 3,79,257نئے کورونا معاملات سامنے آئے اور 3645 اموات درج ہوئی۔ کئی ممالک نے بھارت کو ہر ممکن مدد پہنچا رہے ہیں ۔ اقوام متحدہ (یو این) نے بھی ہندوستان کی طرف مدد کا ہاتھ بڑھیا ہے۔ لیکن بھارت نے یو این کی مدد لینے سے انکار کردیا ہے۔
نیوز ایجنسی پی ٹی آئی کے مطابق یو این سکریٹری جنرل انٹونیو گٹیرس کے ایک ترجمان نے کہا کہ اقوام متحدہ نے اپنی انٹیگریٹڈ سپلائی چین کی مدد کرنے کی پیش کش کی ، جسے بھارت نے یہ کہتے ہوئے مسترد کردیا کہ اس کے پاس لاجسٹکسے نمٹنے کے لئے ایک ‘مضبوط نظام ہے۔
’ہم نے اپنی انٹیگریٹڈ سپلائی چین کی مدد کرنے کی پیش کش کی تھی۔ ہمیں بتایا گیا کہ اس وقت اس کی ضرورت نہیں ہے کیونکہ اس سے نمٹنے کے لئے ہندوستان کے پاس مضبوط نظام موجود ہے۔ لیکن ہماری پیش کش رہے گی اور ہم جس طرح ہوسکے گا مدد کرنے کے لئے تیار ہیں۔‘
کیا یو این کچھ ضروری سامان بھیج رہا ہے؟
امریکہ، روس، جرمنی جیسے کئی ممالک ہندوستان کو آکسیجن سلنڈر سمیت طبی سازوسامان کی ضروری مدد فراہم کررہے ہیں۔ کیا ہندوستان کو اقوام متحدہ کی کسی بھی ایجنسی کے ذریعہ ایسی مدد فراہم کی جارہی ہے؟ اس سوال پر فرحان حق نے کہا کہ ایسا کچھ مانگا نہیں گیا ہے لیکن ہمارے جو لوگ آپریشنل اور لاجسٹک امور کو دیکھتے ہیں وہ بھارت میں لوگوں کے ساتھ رابطہ میں ہیں اور دیکھاجائے گا کہ کیا ضرورت ہے۔فرحان حق نے کہا کہ اقوام متحدہ کے سربراہ کے قریبی ماریہ ربیرو اقوام متحدہ میں ہندوستان کے مستقل نمائندے ٹی ایس تیری مورتی سے رابطے میں ہیں۔
