نئی دہلی: جماعت اسلامی ہند کے امیر سید سعادت اللہ حسینی نے قطر پر اسرائیل کے فضائی حملے کی سخت الفاظ میں مذمت کی ہے۔ میڈیا کے لیے جاری اپنے بیان میں امیر جماعت نے کہا کہ جماعت اسلامی ہند قطر کے دارالحکومت دوحہ میں ایک رہائشی عمارت پر اسرائیل کے بزدلانہ اور مجرمانہ حملے پر اپنی شدید ترین برہمی کا اظہار کرتی ہے۔ یہ کھلی ہوئی ریاستی دہشت گردی ہے۔ اسرائیل کا یہ حملہ قطر کی خودمختاری، بین الاقوامی قوانین اور انسانی اقدار کے تمام اصولوں کی سنگین خلاف ورزی ہے۔
سید سعادت اللہ حسینی نے کہا کہ یہ حملہ جان بوجھ کر حماس کے ان رہنماؤں کو نشانہ بنا کر کیا گیا ہے جن کے ساتھ مذاکرات جاری تھے۔ یہ حملہ اسرائیل کی دھوکہ دہی کے رویے کو بے نقاب کرتا ہے۔ایک ہاتھ سے بات چیت جبکہ دوسرے ہاتھ سے قتل و غارت گری۔ یہ ایک ایسا فریب ہے جو نہ صرف امن کی کوششوں کو سبوتاژ کرتا ہے بلکہ سفارت کاری کا بھی مذاق اڑاتا ہے۔
سید سعادت اللہ حسینی نے مزید کہا کہ اسرائیل نے بارہا بین الاقوامی سرحدوں اور قانونی اصولوں کو اپنی جارحیت سے روندا ہے۔ قطر پر یہ حملہ کوئی الگ واقعہ نہیں بلکہ عالمی قوانین کی کھلی پامالی اور فلسطین سے باہر بھی جنگ کو پھیلانے کے خطرناک منصوبے کا حصہ ہے۔ ہر ایسے اقدام کے ساتھ اسرائیل یہ ثابت کرتا ہے کہ وہ ایک جارح ریاست ہے اور دنیا کے امن کے لیے سنگین خطرہ ہے۔ تقریباً دو برسوں سے اسرائیل نے غزہ، لبنان، شام، یمن، ایران اور مغربی کنارے پر نسل کشی کی مہم جاری رکھی ہے۔ اس نسل کشی نے معصوم انسانوں کا قتل عام اور مشرقِ وسطیٰ کو عدم استحکام سے دو چار کر دیا ہے۔ انہوں نے کہا کہ قطر ایک غیر جانب دار ثالث کا کر دار ادا کر رہا ہے ۔لیکن اسرائیل نے قطر کو نشانہ بنا کر یہ ثابت کردیا ہے کہ اس کی جارحیت سے کوئی ریاست محفوظ نہیں ہے۔ وہ یہ سب کچھ صرف اس لیے کر رہا ہے کہ اسے امریکہ کی مکمل پشت پناہی حاصل ہے۔ جرم کی اس شراکت داری میں امریکہ برابر کا حصے دار ہے۔
اپنے بیان کے اختتام پر امیر جماعت اسلامی ہند سید سعادت اللہ حسینی نے کہا کہ ہم قطر کے عوام اور اس کی قیادت کے ساتھ مکمل یکجہتی کا اظہار کرتے ہیں۔ دنیا کو آخرکار حقیقت کا سامنا کرنا ہوگا۔ اسرائیل محض انسانی حقوق کی خلاف ورزی کرنے والا نہیں بلکہ آزاد ممالک کی خودمختاری کو پامال کرنے والا ایک ایسا مجرم ہے جس کے ظلم کا سلسلہ دراز تر ہوتا جا رہا ہے ۔ اسرائیل کی مجرمانہ کارروائیاں ہمارے دور میں امن و سلامتی کے لیے سب سے بڑا خطرہ ہے۔ اس معاملے میں عالمی برادری کو فیصلہ کن اقدام کرنا چاہیے۔ انہوں نے عالمی برادری سے مطالبہ کیا کہ اسرائیل کو اس کے جرائم کی سزا دی جائے، نسل کشی کو روکا جائے اور اس کی پرفریب جارحیت کے سلسلے پر لگام لگائی جائے ۔(سورس: ہریس ریلیز)
