واشنگٹن: امریکی نائب صدر جے ڈی وینس نے ایک غیر رسمی گفتگو کے دوران اپنی پسندیدہ بھارتی اور پاکستانی شخصیات کے بارے میں بات کرتے ہوئے دو ایسے ناموں کا ذکر کیا جس نے سیاسی اور سفارتی حلقوں کی توجہ اپنی جانب مبذول کر لی۔ ان میں سے ایک نام پاکستان کے فیلڈ مارشل عاصم منیر کا تھا۔
امریکی نائب صدر جے ڈی وینس نے ایران-امریکا مذاکرات کے دوران پاکستان کے فیلڈ مارشل عاصم منیر کی بھرپور تعریف کرتے ہوئے انہیں اپنی زندگی کی اہم ترین شخصیات میں سے ایک قرار دے دیا۔ سوئٹزرلینڈ کے شہر برگن اسٹاک میں مذاکراتی اجلاس سے خطاب کرتے ہوئے وینس نے کہا کہ جب سے فیلڈ مارشل عاصم منیر نے اسلام آباد میں وزیراعظم کے ہمراہ ان کا استقبال کیا، وہ مذاقاً کہا کرتے ہیں کہ ان کی زندگی میں دو انتہائی اہم لوگ ہیں، ایک بھارتی اور ایک پاکستانی۔
جے ڈی وینس نے کہا، "بھارتی میری اہلیہ ہیں اور پاکستانی فیلڈ مارشل عاصم منیر ہیں۔” ان کا کہنا تھا کہ گزشتہ تین ماہ کے دوران انہوں نے عاصم منیر سے کسی بھی دوسرے شخص کے مقابلے میں زیادہ گفتگو کی ہے۔ امریکی نائب صدر نے مزید کہا کہ اگر فیلڈ مارشل عاصم منیر کی مدبرانہ قیادت اور سفارتی کردار نہ ہوتا تو وہ آج اس مذاکراتی عمل کا حصہ نہ ہوتے۔
انہوں نے عاصم منیر کو نہ صرف ایک بہترین فوجی رہنما بلکہ ایک کامیاب سفارت کار بھی قرار دیا۔ وینس کے مطابق فیلڈ مارشل نے ثابت کیا ہے کہ وہ مشکل حالات میں مؤثر سفارتی رابطے قائم کرنے اور مختلف فریقوں کو قریب لانے کی صلاحیت رکھتے ہیں۔ انہوں نے کہا کہ عاصم منیر ایک غیر معمولی قائد ہیں جنہوں نے حالیہ سفارتی پیش رفت میں اہم کردار ادا کیا۔
