پٹنہ — پٹنہ کے مشہور اور مقبول ترین اساتذہ میں شمار ہونے والے ‘خان سر’ کو پٹنہ ہائی کورٹ سے بڑی قانونی راحت مل گئی ہے۔ گیان بندو جی ایس اکیڈمی کے بانی راؤشن آنند کے بھائی پرنس کی مشتبہ حالات میں موت اور اس کے بعد خان سر کے خلاف نامزد شکایت درج ہونے کے بعد، عدالتِ عالیہ نے خان سر کی ممکنہ گرفتاری پر عبوری روک لگا دی ہے۔ کورٹ نے خان سر کو حاصل ‘انٹرم پروٹیکشن’ (عبوری تحفظ) کی مدت میں مزید توسیع کر دی ہے۔
اس فیصلے کے بعد پٹنہ پولیس اب اگلی عدالتی سماعت تک خان سر کو گرفتار نہیں کر سکے گی- عدالتی سماعت کے دوران خان سر کے وکلا نے مؤقف اختیار کیا کہ معاملے کی مکمل سماعت اور حقائق کے جائزے تک انہیں قانونی تحفظ فراہم کیا جانا چاہیے۔ عدالت نے ابتدائی دلائل سننے کے بعد عبوری تحفظ جاری رکھنے کا فیصلہ کیا اور متعلقہ فریقین سے آئندہ سماعت پر مزید جواب طلب کر لیا۔
