پٹنہ : ملک کی دیگر ریاستوں کی طرح بہار میں بھی کووڈ وبا کی رفتار کم ہوئی ہے ۔ وہیں آج لاک ڈاؤن 4-کی آخری دن ہے۔ سب کی نگاہیں آج ہونے والی ڈیزاسٹر مینجمنٹ گروپ کی میٹنگ پر مرکوز ہیں ، جس میں طےہو گا کہ کل سے بہار میں کیا کھلے گا اور کیا نہیں۔ میٹنگ کے بعد محکمہ داخلہ لاک ڈاؤن- 5 کے بارے میں حکم جاری کرے گا ، جس پر عمل درآمد 9 جون کو ہوگا۔
ذرائع کے مطابق وزیر اعلیٰ نتیش کمار نے اس سلسلے میں بہار کے تمام اضلاع کے ضلع مجسٹریٹ سے فیڈبیک لیا ہے۔ اس کی بنیاد پر کہا جارہا ہے کہ 8 جون کے بعد بہار میں لاک ڈاؤن کو بڑھایا جاسکتا ہے ، لیکن یہ ایک طرح سے ان لاک کے عمل کا آغاز بھی ہوگا۔ اسی دوران کئی پابندیاں ختم ہوں گی اور چھوٹ ملے گی لیکن اس کے ساتھ ہی تمام ضلع کے ضلع مجسٹریٹ کو سختی برتنے کا حکم بھی دیا جائے گا۔
مل سکتی ہے یہ چھوٹ
لاک ڈاؤن 5 میں اور بھی کئی طرح کی چھوٹ ملنے کی امید ہے۔ دکانوں کے کھلنے کے وقت میں اور زیادہ چھوٹ مل سکتی ہے۔ ساتھ ہی آمد ورفت سے متعلق بھی کئی اہم فیصلے آج کی میٹنگ میں لئے جانے کا امکان ہے ۔ متعلقہ محکموں نے بھی رائے دی ہے کہ لاک داؤن کو ابھی پوری طرح نہیںہٹایا جانا چاہئے۔ ذرائع کے مطابق لاک ڈاؤن ابھی جاری رہنے کی امید ہے، حالانکہ لاک ڈاؤن 4-کے مقابلے لاک ڈاؤن 5-میں پابندیوں میں مزید نرمی دی جاسکتی ہے۔ ابھی شہری اور دیہی علاقوں میں دکانوں کو صبح 6 سے دوپہر 2 بجے تک کھولنے کی اجازت ہے، مانا جارہاہے کہ دکانوں کو شام 4 یا اس کے بعد کھولنے کی اجازت ملے گی۔
