کمبھ کو اب علامتی رکھا جائے: مودی

دہرادون ؍ نئی دہلی:
وزیر اعظم نریندر مودی نے ہفتہ کی صبح اتراکھنڈ کے ہری دوار میں جونا اکھاڑہ کے آچاریہ مہامنڈلیشور سوامی اودھیش آنند گری سے فون پر بات کرکے تمام سنتوں کی صحت کی معلومات حاصل کی اور انتظامیہ کے ساتھ مکمل تعاون کے لئے سنت برادری کے تئیں اظہار تشکر کیا۔
مسٹر مودی نے اپیل کی کہ دو شاہی اشنان مکمل ہوچکے ہیں ، لہٰذا اب کمبھ کو علامتی طور پر رکھا جائے۔ اس سے وباکے خلاف جنگ میں تقویت ملے گی۔ یہ اطلاع خود مسٹر مودی نے ٹویٹ کرکے دی۔
وزیر اعظم سے بات کرنے کے بعد آچاریہ مہامنڈلیشور سوامی اودھیش آنند گری نے مسٹر مودی کی اپیل کا احترام کرتے ہوئے صبح 11 بجے پریس کانفرنس میں اپنا رد عمل ظاہر کیا۔ انہوں نے عقیدت مندوں سے گزارش کی کہ وہ کووڈ کے حالات کو دیکھتے ہوئے بڑی تعداد میں اشنان کے لئے نہ آئیں اور انہیں کووڈ کے اصولوں پر عمل کرنا چاہئے۔
واضح رہے کہ کووڈ انفیکشن کی وجہ سے دو اکھاڑوں نے ہفتے کے روز کمبھ ختم کرنے کا اعلان کیا تھا۔ نرنجنی اکھاڑے کے اکھاڑوں میں کورونا انفیکشن بے قابو ہوگیا ہے۔ پنچایتی اکھاڑہ شری نرنجنی کے مہند روی پوری سمیت 22 سنت کووڈ مثبت ملے ہیں۔ وہیں دیگر اکھاڑوں میں سات سنت کورونا سے متاثر ہوئے ہیں۔ اس کے ساتھ ہی اکھاڑوں میں متاثرہ سنتوں کی کل تعداد 78 ہوگئی ہے۔
ہری دوار کے چیف میڈیکل سپرنٹنڈنٹ ڈاکٹر ایس کے جھا نے بتایا کہ ضلع میں جمعہ کے روز 592 نئے متاثرہ افراد پائے گئے۔
دریں اثنا ، حکومت کے ترجمان سبودھ انیال نے کہا کہ سرکاری حکم کے مطابق 30 اپریل تک کمبھ میلہ چلے گا۔ انہوں نے سب سے سماجی فاصلہ برقرار رکھنے اور ماسک لگانے کی بھی درخواست کی ہے۔