ایرانی بندرگاہ پر بھیانک  دھماکہ،ابتک 4اموات،پانچ سوسے زائد زخمی

ایران کے نیم سرکاری خبر رساں ادارے تسنیم نے ہفتے کے روز ایک مقامی اہلکار کے حوالے سے اطلاع دی کہ جنوبی ایران کے شہر بندر عباس میں واقع رجائی بندرگاہ ایک زوردار دھماکے سے لرز اٹھی۔ اہلکار نے کہا کہ واقعے کی وجہ تاحال معلوم نہیں ہو سکی۔دھماکے اور آتش زدگی کا واقعہ تہران کے جنوب میں 1000 کلومیٹر (620 میل) سے زیادہ فاصلے پر ایران کے صوبہ ہرمزگان کی اہم بندرگاہ پر پیش آیانیم سرکاری فارس نیوز ایجنسی کے ابتدائی اندازوں کے مطابق ہفتے کے روز دھماکے میں کم از کم 516 افراد زخمی ہوئے۔ انہیں ہسپتال منتقل کر دیا گیا ہے۔
ہرمزگان پورٹس اینڈ میری ٹائم ایڈمنسٹریشن کے ایک سینئر اہلکار اسماعیل مالکی زادہ نے سرکاری ٹیلی ویژن کو بتایا، "دھماکہ شہید رجائی بندرگاہ کے عرشے کے ایک حصے میں ہوا اور ہم آگ بجھا رہے ہیں۔”
دریں اثنا تازہ ترین اطلاع میں بتایا گیا ہے  ایران کے جنوبی علاقے بندر عباس میں شاہد راجئی بندرگاہ پر دھماکے میں 4 افراد کے ہلاک ہونے کی اطلاعات ہیں۔ خبر رساں ایجنسی پی ٹی آئی نے اے پی کی رپورٹ کے حوالے سے یہ اطلاع دی ہے۔اس دھماکے میں ہلاک ہونے والوں کی تعداد میں مزید اضافہ ہو سکتا ہے۔ تمام زخمیوں کو علاج کے لیے قریبی اسپتال لے جایا گیا ہے۔ فی الحال یہاں راحت اور بچاؤ کا کام شروع کر دیا گیا ہے۔  
نیوز ایجنسی اے پی اور ایران کے سرکاری میڈیا نے بھی اس ہولناک واقعے کی تصدیق کی ہے۔ ابتدائی معلومات کے مطابق دھماکا کنٹینرز کی وجہ سے ہوا۔ اس دھماکے سے متعلق کئی تصاویر اور ویڈیوز سامنے آئی ہیں۔ اس دھماکے کا اثر کئی کلومیٹر دور تک دیکھا گیا۔ دھویں اور دھماکے کی تصاویر اور ویڈیوز خوفناک ہیں۔