طیارہ حادثہ پر مولانا محمود مدنی کا اظہار تعزیت ،جمعیتہ کارکنان کو متاثرہ خاندانوں کو ہر ممکن مدد پہنچانے کی تلقین

نئی دہلی۱۲؍ جون :  جمعیۃ علماء ہند کے صدر مولانا محمود اسعد مدنی نے احمد آباد میں پیش آئے اندوہناک طیارہ حادثہ پر گہرے رنج و غم اور افسوس کا اظہار کیا ہے۔مولانا مدنی نے کہا کہ یہ حادثہ صرف متاثرہ خاندانوں ہی کا نہیں، بلکہ پورا ملک اس درد اور المیہ میں شامل ہے۔انھوں نے کہا کہ جو زندگیاں اچانک اس سانحہ کی نذر ہو گئیں، ان کے خاندان اور بعض قومی اہمیت کی حامل شخصیات کے تناظر میں ملک کے لیے یہ خلا کبھی پُر نہیں ہو سکتا۔ وہ لوگ جو اپنے اعزہ و اقربا کو حسب معمول رخصت کر رہے تھے، ان کے تصور سے پرے یہ بات تھی کہ یہ جدائی ہمیشہ کی جدائی بن جائے گی۔ ایسے لمحات میں جذبات کے اظہار میں الفاظ بے بس ہو جاتے ہیں، صرف دعا اور دلی ہمدردی ہی سہارا بن سکتی ہے۔
مولانا مدنی نے جاں بحق ہونے والوں کے لواحقین کے لیے صبر اور زخمیوں کی جلد صحت یابی کی دعا کی ہے۔ ساتھ ہی انہوں نے حکومت ہند اور متعلقہ ایجنسیوں سے مطالبہ کیا کہ متاثرہ خاندانوں کو فوری طور پر ہر ممکن امداد فراہم کی جائے۔مولانا مدنی نے جمعیۃ علماء ہند کی اکائیوں کو بھی تلقین کی کہ وہ متاثرہ خاندانوں سے رجوع کریں، ان کے دکھ درد میں شریک ہوں اور ہر ممکن تعاون فراہم کریں۔ہم دکھ کی اس گھڑی میں متاثرہ خاندانوں کے ساتھ ہیں، ان کا درد ہمارا درد ہے۔