چنڈی گڑھ : (ایجنسی)
بھارت اور پاکستان کے درمیان میچ ختم ہونے کے بعد بھارت کی شکست سے افسردہ کچھ لوگوں نے اپنا غصہ کشمیری طلباء پر نکالا۔ پنجاب کے کئی کالجوں میں زیر تعلیم کشمیری طلبہ سے پرمشتعل لوگوں نے ان کے ساتھ مار پیٹ کی اور ہاسٹل کے کمروں میں توڑ پھوڑ کی۔ الزامات یوپی اور بہار کے کچھ نوجوانوں پر لگ رہے ہیں ۔
یہ واقعہ پنجاب کے سنگرور میں بھائی گرو داس انسٹی ٹیوٹ آف انجینئرنگ اینڈ ٹیکنالوجی کالج میں پیش آیا، جہاں بھارت کی پاکستان سے دس وکٹوں سے ہارنے کے بعد کئی طلبہ کو ان کے ہاسٹل کے کمروں میں گھس کر مارا پیٹا گیا۔
فری پریس کشمیر کے مطابق کئی طلبہ میں سے ایک نے فیس بک پر حملے کا لائیو اسٹریم کیا،جب ان پر راڈ اور لاٹھیوں سے حملہ کیا جا رہا تھا، کیونکہ حملہ آور ان کے کمروںمیں گھس گئے تھے ۔
ویڈیو میں طالب علم نے یہ بھی کہا کہ یوپی-بہار کے نوجوانوں نے اس پر حملہ کیا اور کمروں میں توڑ پھوڑ کی۔
ہم اپنے ہاسٹل کے کمروں میں تھے تبھی ہمیں باہر سے کچھ آوازیں سنائی دیں۔ ہم دیکھنے گئے کہ کیا ہو رہاہے ، تو ہم نے دیکھا کہ دوسرے بلاک میں کچھ لوگ کشمیری طلبہ کو پیٹ رہے تھے ۔ انہوں نے ان کے کمروں کی کھڑکی کے شیشے توڑ دیئے تھے اور مسلسل ’ تم پاکستانی ہو‘ کے نعرے لگارہے تھے ۔
فری پریس کشمیر کے مطابق کئی مقامی پنجابیوں نے ان کشمیری طلباء کو حملہ آوروں سے بچایا۔ طلباء نے اس واقعہ کی شکایت کالج انتظامیہ سے کی ہے۔ کالج کا کہنا ہے کہ معاملے کو سنجیدگی سے لیا جائے گا۔
کل 6 طلباء کے سنگین ہونے کی اطلاع اب تک ملی ہے ۔ جموں وکشمیر اسٹوڈنٹس یونین کے ترجمان نے کہا ہے کہ انہوں نے پنجاب پولیس سے شکایت کی ہے ۔ پولیس نے انہیں یقین دہانی کرائی ہے کہ اس معاملے کو سنگین سے لیں گے اور ان لوگوں کے خلاف سخت کارروائی کریں گے ،جو اس میں شامل ہیں۔
