نئی دہلی :
شیو سینا کے سینئر لیڈر اور رکن پارلیمنٹ سنجے راوت نے کہا ہے کہ مودی حکومت نے پارلیمنٹ کے مانسون سیشن کے اختتام پر راجیہ سبھا کے اندر احتجاج کرنے والے ارکان پارلیمنٹ پر حملہ کرنے کے لیے کرائے کے ٹٹو بھیجے تھے۔ یہ باہری لوگ تھے۔انہوں نے بتایا کہ سینئر لیڈر شرد پوار نے 55 سال تک پارلیمانی جمہوریت میں کام کرچکے ہیں۔ انہوں نے اس پر دکھ کا اظہار کرتے ہوئے کہا کہ انہوں نے اپنی 55 سالہ پارلیمانی زندگی میں ایسا کبھی نہیں دیکھا۔ یہ حکومت کیا کرنا چاہتی ہے؟
میڈیا کو انٹرویو دیتے ہوئے ، انہوں نے کہا کہ جنرل انشورنس والا بل طے ہوا تھا کہ اسے اگلے دن لانا ہے ،کیونکہ او بی سی والے بل پر متفقہ طور پر بحث کرنا تھا۔ پانچ گھنٹے بحث کرکے منظور کیا۔ کھڑگے صاحب سے بات ہو گئی تھی ۔ لیڈر آف دی ہاؤس نے کہا تھا کہ اگلے دن کریں گے۔ پھر بھی جس طرح بل لایا گیا ، وہ ٹھیک نہیں تھا۔ ویل میں آنا ارکان پارلیمنٹ کا حق ہے ۔ بھارتیہ جنتا پارٹی کے لوگ بھی پہلے آتے تھے۔ آج بھی آتے ہیں ۔ آپ نے مارشل کو بلایا اس طرح جیسے ہم پاکستان کی سرحد پر کھڑے ہیں۔ ایسے بارڈر بنا لئے تھے ، صرف فیسنگ لانا باقی تھی ۔بندوق لانا باقی تھا۔
کیا آپ ہمیں ڈرانا چاہتے ہیں؟ آج ہم ہیں ، کل آپ ہوں گے۔ آپ نے بھی یہ سب کچھ کیا ہے اور سب سے زیادہ خواتین مارشل کو بلایا ۔ یہ کون سی پالیسی ہے کہ مرد ارکان پارلیمنٹ کے سامنے آپ نے خاتون مارشلوں کو کھڑے کردئے ہیں۔ آپ کیا دکھانا چاہتے ہو، کون سی مردانگی دکھانا چاہتے ہو؟
ملک کی پارلیمانی تاریخ میں یہ درست نہیں ہے۔ پارلیمانی تاریخ میں ایسی صورتحال کیوں پیدا ہوئی ہے اور حکومت کیا کرنا چاہتی ہے یہ معلوم ہونا چاہیے۔ عوام کو سب کچھ جاننے کا حق ہے۔ آپ عوام کو بتائیں کہ آپ نے ایسا کیوں کیا؟
