جنتر منتر پراحتجاجی مظاہرہ میں بھرپور شرکت کریں :صدر جمعیتہ مولانا محمود مدنی کی پرزوراپیل

*وقف اللہ کی ملکیت ہے، حکومت مسلمانوں کے مذہبی معاملات میں مداخلت نہ کرے – جمعیۃ علماء ہند
نئی دہلی 8 مارچ:  آل انڈیا مسلم پرسنل لا بورڈ و دیگر ملی جماعتوں کی جانب سے 13 مارچ 2025 کو جنتر منتر، نئی دہلی میں وقف  بل کے خلاف ایک بڑا احتجاجی مظاہرہ  کیا جا رہا ہے۔ جمعیۃ علماء ہند کے صدر مولانا محمود اسعد مدنی اور ناظم عمومی مولانا محمد حکیم الدین قاسمی نے اس مظاہرے کی مکمل تائید کرتے ہوئے کہا کہ حکومت کا موجودہ وقف بل پر اصرار  مسلم اوقاف کی مذہبی ودینی حیثیت  کو ختم کرنے کی کوشش ہے۔انھوں نے واضح کیا  کہ وقف کسی فرد کی ملکیت نہیں، بلکہ اللہ کی ملکیت ہے۔ اس کی اصل میں کسی قسم کی تبدیلی  یا مداخلت نہ صرف شرعی اصولوں کے خلاف ہے بلکہ آئینی حقوق کی بھی خلاف ورزی ہے۔ ہم حکومت کو واضح طور پر متنبہ کرتے ہیں کہ وہ مسلمانوں کے مذہبی معاملات میں دخل اندازی سے باز رہے۔
اس موقع پر جمعیۃ علماء ہند تمام انصاف پسند شہریوں، دینی و سماجی رہنماؤں اور ملت کے تمام طبقات سے اپیل کرتی ہے کہ وہ اس پرامن احتجاج میں بھرپور شرکت کریں اور اپنے جمہوری و آئینی حق کی حفاظت کے لیے اپنے حصے کا عملی کردار پیش کریں۔