گروگرام : (ایجنسی)
مسلم کمیونٹی کے لوگوں نے پیر کو کہا کہ انہوں نے گڑگاؤں کے سیکٹر 12 میں کھلے میں جمعہ کی نماز نہ پڑھنے کا فیصلہ کیا ہے۔
انگریزی اخبار ہندوستان ٹائمز کی رپورٹ کے مطابق یہ جگہ ضلع انتظامیہ نے نماز کی ادائیگی کےلیے طے تھی ، لیکن دائیں بازو ہندو گروپوں سے کسی طرح کے ٹکراؤ سے بچنے اور تمام مذاہب کے ’ ہم آہنگی ،بقائے باہمی‘ کے لیے وہاں نماز نہ پڑھنے کا فیصلہ کیاگیا ہے۔
ہریانہ وقف بورڈ کے ممبران اور کمیونٹی لیڈروں نے پیر کو ڈپٹی کمشنر سے ملاقات کی اور وزیر اعلیٰ کو ایک میمورینڈم پیش کیا جس میں کھولی جگہوں پر نماز بند کرنے کی پیشکش کی گئی ہے ۔ ساتھ ہی اپیل کی گئی ہے کہ متعلقہ حکام کو ہدایت دی جائے کہ وہ مساجد اور وقف بورڈ کی اراضی سے تجاوزات کو ہٹایا جائے ۔
ہریانہ وقف بورڈ کے رکن اور مسلم راشٹریہ منچ کے صدر خورشید رزاق نے کہا کہ پولیس کی حفاظت میں ہر جمعہ کو نماز نہیں پڑھی جا سکتی۔ ’مظاہروں کے درمیان اور لوگوں کی خواہشات کے خلاف نماز ادا کرنا اسلام اور قومی اتحاد کے موافق نہیں ہے۔ ہم نہیں چاہتے کہ ہمارے ہندو بھائی ناخوش ہوں اور ہماری نماز کو روکنے کے لیے احتجاج کا سہارا لیں۔
