انسانی حقوق کی تنظیمیں اور اپوزیشن جماعتیں مسلسل بی جے پی کی حکومت والی ریاستوں پر مسلمانوں کے خلاف بلڈوزر کارروائی، اشتعال انگیز تقاریر اور ماب لنچنگ کے بڑھتے ہوئے واقعات کا الزام لگا رہی ہیں۔ جس کی وجہ سے ملک کی سب سے بڑی اقلیتی برادری میں خوف و ہراس پھیل گیا ہے۔ اس صورتحال پر تشویش کا اظہار کرتے ہوئے گجرات کانگریس کے مسلم لیڈروں نے مرکز میں اپوزیشن لیڈر راہل گاندھی سے مطالبہ کیا ہے کہ وہ پارلیمنٹ کے موجودہ اجلاس میں ان مسائل کو سختی سے اٹھائیں ۔
نوبھارت ٹائمز کے مطابق گجرات کانگریس کی تنظیم سازی مہم کے تحت آنند میں ضلع صدر کے تربیتی کیمپ کے دوران کانگریس ایم ایل اے عمران کھیڑا والا، سابق ایم ایل اے غیاث الدین شیخ اور جاوید پیرزادہ نے راہل گاندھی سے ملاقات کی اور انہیں میمورنڈم سونپا۔ اس میمورنڈم میں گجرات کے احمد آباد کے گر سومناتھ، جوناگڑھ، بیٹ دوارکا، چندولا تالاب اور اودھو جیسے علاقوں میں تین نسلوں سے رہنے والے غریب مسلم خاندانوں کے گھروں پر بلڈوزر کی کارروائی کے خلاف اعتراض اٹھایا گیا۔کانگریس قائدین نے کہا کہ پیشگی اطلاع اور مناسب متبادل انتظام کے بغیر ایسے مکانات کو منہدم کرنا سپریم کورٹ کے رہنما خطوط اور آئین دونوں کی خلاف ورزی ہے۔ انہوں نے مطالبہ کیا کہ بلڈوزر کارروائی سے قبل شہریوں کو نوٹس دیا جائے، انہیں دستاویزات جمع کرانے کا وقت دیا جائے اور 10 سال سے زائد عرصے سے وہاں مقیم افراد کو بحالی کی سہولیات فراہم کی جائیں۔میمورنڈم میں یہ بھی الزام لگایا گیا ہے کہ مہاراشٹر، اتر پردیش، آسام اور اتراکھنڈ جیسی بی جے پی کی حکومت والی ریاستوں کے وزرائے اعلیٰ کھلے عام اشتعال انگیز تقاریر کر رہے ہیں، جس سے نفرت کا ماحول پیدا ہو رہا ہے۔ سپریم کورٹ کے تحسین پونا والا کے فیصلے کا حوالہ دیتے ہوئے کانگریس لیڈروں نے پولیس سے مطالبہ کیا کہ وہ نفرت انگیز تقریر کے معاملات میں نوٹس لے اور کارروائی کرے۔
آج تک میں شائع رپورٹ کے مطابق، پروگرام کے دوران مسلم رہنماؤں نے راہل گاندھی سے بھی اپیل کی کہ وہ ہجومی تشدد اور عبادت گاہوں کے ایکٹ 1991 پر توجہ دیں۔ رہنماؤں نے کہا کہ ہجومی تشدد کے واقعات میں سخت دفعات کے تحت کارروائی کی جانی چاہیے اور حکومت کو عبادت گاہوں کے تحفظ کے لیے ٹھوس اقدامات کرنے چاہئیں۔
