نئی دہلی (اسما زریں )
اگر آر ایس ایس کے سربراہ موہن بھاگوت اور ایس پی کے بانی اور سماجوادی نیتا جی ملائم سنگھ یادو ایک ہی صوفے پر بیٹھے ہیں تو یہ تصویر سیاسی ماہرین کو حیران کر دے گی۔ کیونکہ دونوں کا نظریہ اور سیاست بالکل ایک دوسرے کے مخالف ہیں۔ بھاگوت اور ملائم کی ایک جیسی تصویر سامنے آنے کے بعد کافی چرچا ہے، کانگریس نے اپنے ٹوئٹر اکاؤنٹ سے اس کو ٹویٹ کرکے ایس پی پر طنز کیا ہے۔
ہوا یوں کہ پیر کو نائب صدر وینکیا نائیڈو کی پوتی کی شادی کے استقبالیہ میں موہن بھاگوت اور ملائم سنگھ یادو کو ایک ہی صوفے پر بیٹھے دیکھا گیا اور اس دوران وہ آنے والے تمام لوگوں سے ملتے رہے۔ ان کی یہ تصویر مرکزی وزیر ارجن رام میگھوال نے ٹویٹ کی ہے۔ ویسے اگر نیتا جی سے پو چھا جائے تو وہ اس کو اخلاقی و غیر رسمی ملاقات کہیں گے اور سیاست میں نہ کوئی دوست ہوتا ہے نہ دشمن تو پھر ایسی تصاویر پر سوال اٹھانا بیکار ہے۔ گزشتہ دنوں بھیا اکھلیش اپنے پوجیہ پتا جی کے ساتھ بابا یوگی ناتھ جی سے ملنے گئے وہ فوٹو بھی سامنے آیا تھا۔ پی ایم تو نیتا جی کے گھر شادی تک میں ہو آئے تھے۔ مطلب سیاسی گالی گلوج اور تو تو میں میں کے باوجود رشتے ’مدھر‘ ہیں ہاں آپ کو اس کی اجازت نہیں ہے، نہ قوم برداشت کرے گی نہ یہ پارٹیاں ۔فوراً غدار،ملت فروش جیسے ٹیگ ملنے لگیں گے ۔ہم ان کو تو کچھ کہہ نہیں سکتے سو اپنوں پر ہی غصہ بلکہ بھڑاس نکال لیتے ہیں قہر درویش بر جان درویش ایسے ہی موقع پر بولا جاتاہے جناب۔
