سنبھل میں بلڈوزر ایکشن :شادی ہال مسمار، مسجد بھی گرانے کی تیاری

سنبھل ضلع میں ایک بار پھر مبینہ غیر قانونی تعمیرات پر انتظامیہ کا بلڈوزر چل رہا ہے ۔ اس کے لیے پولیس کی بھاری نفری تعینات کی گئی ہے۔ جمعرات کو تالاب کی اراضی پر ناجائز قبضہ کرکے تعمیر کردہ مسجد اور میریج ہال کو گرانے کے حکم کے بعد انتظامیہ کی جانب سے غیر قانونی تعمیرات کو مسمار کیا جارہا ہے۔ سنبھل کے رایا بزرگ گاؤں میں یہ بڑی کارروائی کی جا رہی ہے۔ انتظامیہ کے دعوے کے مطابق یہ تعمیر سرکاری تالاب کی زمین پر غیر قانونی طور پر کی گئی ہے۔ جمعرات کی صبح 11 بجے کارروائی شروع کی گئی تھی۔ انتظامیہ امن و امان برقرار رکھنے کے لیے پوری طرح تیار ہے۔ کارروائی کے دوران نیم فوجی دستوں اور پولیس کی کئی کمپنیاں موقع پر موجود ہیں۔غیر قانونی طور پر تعمیر شدہ مسجد اور شادی ہال پر بلڈوزر کارروائی سے پہلے پولیس انتظامیہ نے گاؤں میں اعلان کیا تھا کہ لوگ گھروں میں رہیں اور باہر نہ نکلیں۔ پی اے سی کے اہلکار اور متعدد تھانوں کی پولیس جائے وقوعہ پر موجود ہے اور کسی بھی صورتحال سے نمٹنے کے لیے تیار ہے۔
کمیٹی نے مسجد کو مہلت دینے کی درخواست کی۔
مسجد کی انتظامی کمیٹی نے ضلعی انتظامیہ سے چار دن کی توسیع کی درخواست کی ہے اور مسجد کو نہ گرانے کی استدعا کی ہے۔ جس کے بعد انتظامیہ نے چار دن کی توسیع کر دی ہے۔ چار دن کے اندر مسجد کی انتظامی کمیٹی مسجد کو خود گرا دے گی۔ اطلاعات کے مطابق ضلعی انتظامیہ نے شادی ہال کو بلڈوزر سے گرا دیا ہے، انتظامی کمیٹی مسجد کو خود گرائے گی۔ اگر ایسا نہ ہوا تو انتظامیہ مزید فیصلہ لے سکتی ہے۔