کولکاتا:
سی بی آئی کی خصوصی عدالت نے ناردا اسٹنگ کیس میں گرفتار ٹی ایم سی کے چاروں ایم ایل اے کو ضمانت دے دی ہے ۔ ان میں دو وزراء بھی شامل ہیں۔ مرکزی تفتیشی بیورو نے ان چاروں کو پیر کو گرفتار کرلیا تھا۔سی بی آئی نے وزیر برائے میونسپل ڈیولپمنٹ فرہاد حکیم ، وزیر برائے پنچایت سبرت مکھرجی ، ایم ایل اے مدن مترا اور ایم ایل اے شوبھن چٹرجی کو گرفتار کرکے کولکاتا واقع بینک شال میں پیش کیا۔ناردا اسٹنگ کیس میں سی بی آئی نے ان سبھی لیڈروں کو پیر کی دوپہر میں ہی گرفتار کیا تھا ۔ ان لیڈروں کے خلاف سی بی آئی چارج شیٹ داخل کرنے والی تھی ۔ اس معاملہ میں کچھ لیڈروں کے مبینہ طور پر رقم لئے جانے کے معاملہ کا انکشاف ہوا تھا ۔
سی بی آئی ٹیم نے پیر کو ممتا بنرجی سرکار میں کابینہ وزیر فرہاد حکیم ، سبرت مکھرجی ، ممبر اسمبلی مدن مترا اور سابق میئر شوبھن چٹرجی کو گرفتار کیا تھا ۔ اپنے وزراء اور ممبران اسمبلی کی گرفتار سے بھڑکیں وزیر اعلیٰ ممتا بنرجی سی بی آئی دفتر میں ہی دھرنے پر بیٹھ گئی تھیں ۔
ترنمول کانگریس کے اراکین اسمبلی کی وکالت کرتے ہوئے سینئر ایڈوکیٹ کلیان بانیواپادھیائے نے اس معاملے پر سی بی آئی کا گھیراؤ کیا ، کیوں کہ اسی اسکینڈل میں ملوث بی جے پی کے دو ممبران اسمبلی ، مکول رائے اور شوبھندیو ادھیکاری کو کیوں گرفتار نہیں کیا گیا، حالانکہ سی بی آئی نے ترنمول کانگریس کے ممبران اسمبلی کی ضمانت کی مخالفت کی، لیکن عدالت نے مخالفت منظور کرتے ہوئے ضمانت منظور کرلی۔
50 ہزار کے مچلکے پر ضمانت
سی بی آئی کی خصوصی عدالت کے جج انوپم مکھرجی نے چاروں ایم ایل اے کو 50ہزار روپے کے ذاتی مچلکے پر ضمانت منظور کرلی، لیکن سی بی آئی اس فیصلے کو ہائی کورٹ میں چیلنج کر سکتی ہے۔ سماعت کورونا پروٹوکول کے مدنظر ورچوئل طریقے سے یعنی آن لائن ہوئی۔
وہیں ٹی ایم سی کے سینئر لیڈروں کی اس طرح گرفتاری کے بعد سے پارٹی کارکنان سی بی آئی دفتر کے باہر احتجاج کررہے تھے ۔ سی بی آئی آفس کے باہر موجود بھیڑ نعرے بازی اور دھکا مکی کرتی نظر آئی ، جس کے بعد وہاں دفتر کی سیکورٹی کیلئے مرکزی سیکورٹی فورسز کو تعینات کیا گیا ہے ۔
اس درمیان بی جے پی ریاستی صدر دلیپ گھوش نے الزام لگایا ہے کہ ممتا بنرجی ریاست میں انارکی پھیلا رہی ہیں ۔ انہوں نے کہا کہ سی بی آئی نے یہ گرفتاری عدالت کے کہنے پر کی ہے ۔ کیا ٹی ایم سی کو عدالت پر بھی بھروسہ نہیں ہے ۔
اس سے پہلے چاروں لیڈروں کو پیر کی صبح کولکاتا کے نظام پیلس میں سی بی آئی دفتر لے جایا گیا ۔ ان لیڈروں کی گرفتار کی خبریں آنے کے فوراً بعد مغربی بنگال کی وزیر اعلیٰ ممتا بنرجی اپنے لیڈروں کے ساتھ سی بی آئی دفتر پہنچ گئی تھیں ۔ اس دوران انہیں سی بی آئی افسران سے یہ کہتے ہوئے سنا گیا کہ وہ انہیں بھی گرفتار کرلیں ۔
