رام پور (محی الدین گلفام)
اتر پردیش کے وزیر اعلیٰ یوگی آدتیہ ناتھ انتخابی تیاریوں میں جان ڈالنے اور کارکنان میں روح پھونکنے کے مقصد سے مغربی اتر پردیش کے مسلسل دوروں کے درمیان پیر کو رام پور پہنچے۔ اس سے پہلے انھوں نے شاملی ضلع کے دورہ کے دوران کیرانہ میں نقل مکانی کر کے آنے والے تاجروں سے ملاقات کی۔
اس موقع پر وزیر اعلیٰ نے ضلع شاملی کو بہت سی سوغاتیں دیں اور کئی ترقیاتی پروجیکٹس عوام کے نام کیے۔ شاملی سے وزیر اعلیٰ سیدھے قید و بند کی صعوبت جھیل رہے سینیئر سماجوادی لیڈر اعظم خان کے گڑھ رام پور پہنچے، جہاں بی جے پی ضلع صدر سوتنتر دیو نے انھیں رامائن بھینٹ کی۔ وزیر اعلیٰ نے رام پور میں 20 پروجیکٹوں کا افتتاح کیا نیز ان کا سنگ بنیاد رکھا۔ وزیر اعلیٰ یوگی آدتیہ ناتھ نے یہاں جلسۂ عام سے خطاب کرتے ہوئے کہا کہ کچھ لوگوں نے رام پور کی وراثت کو مٹا دیا ہے۔ اعظم خاں کو نشانہ بناتے ہوئے وزیر اعلیٰ نے کہا کہ غریبوں کی زمینوں پر زمین مافیا کا قبضہ نہیں ہونے دیں گے۔ انھوں نے عوام سے خطاب کرتے ہوئے کہا کہ آج رام پور ترقی کی راہ پر چل رہا ہے، زمین مافیا پر ہمارا ڈنڈا چل رہا ہے۔ انھوں نے ریاست میں اپنی حکومت کی حصول یابیاں شمار کراتے ہوئے کہا کہ رام پور میں 147 زمین مافیا کے خلاف کارروائی کی گئی ہے۔ غریبوں کو مکان دیے جا رہے ہیں، یو پی میں بلا تفریق سرکاری اسکیموں کے فوائد عوام کو حاصل ہو رہے ہیں۔ وزیر اعلیٰ نے کہا کہ یوپی کے کسانوں کے قرضے معاف کر دیے گئے ہیں۔ جلسہ عام سے خطاب کے دوران وزیر اعلیٰ یوگی آدتیہ ناتھ نے کہا کہ ایودھیا میں رام مندر ہماری میراث ہے۔ ہم نے قدیم ترین ورثے کو محفوظ رکھا ہے۔ اتر پردیش میں بغیر کسی امتیاز کے اسکیموں کا فائدہ دیا جا رہا ہے اور کسی کے ساتھ بھی سوتیلا برتاؤ نہیں کیا جا رہا ہے۔ انھوں نے کہا ہماری حکومت میں چہرہ دیکھ کر کام نہیں کیا جاتا۔ وزیراعلیٰ نے سخت لہجہ اپناتے ہوئے کہا کہ اگر کوئی امن و امان میں خلل ڈالنے کی کوشش یا سازش کرتا ہے تو ہماری حکومت میں ایسے لوگوں کے خلاف نرمی نہ برتی گئی ہے، نہ آئندہ برتی جا ئے گی۔
اس سے پہلے وزیر اعلی یوگی آدتیہ ناتھ ڈھائی بجے کے متعینہ وقت سے سوا گھنٹے تاخیر سے تقریباً 3.45 پر رام پور پہنچے۔ آسمان پر ہیلی کاپٹر نظر آتے ہی پنڈال میں موجود لوگ پر جوش ہو گئے۔ پولیس لائن میں ہیلی کاہٹر اترنے کے بعد وزیر۔اعلیٰ سڑک کے راستے جلسہ گاہ واقع مہاتما گاندھی اسٹیڈیم پہنچے۔ وزیر اعلیٰ یوگی کے قافلہ کے پنڈال میں پہنچتے ہی یوگی زندہ باد کے نعرے گونجنے لگے۔ اسٹیج پر جانے سے قبل وزیر اعلیٰ نے منعقد نمائش کا معائنہ کیا۔ مختلف محکموں کے اسٹالز کا معائنہ کرنے کے بعد وزیر اعلیٰ اسٹیج پر پہنچے۔ وزیر اعلیٰ کی آمد کو لے کر کارکنان کے جوش کا اندازہ اسی بات سے لگایا جا سکتا ہے کہ ان کے رام پور پہنچنے سے بھی ایک گھنٹہ پہلے سے پنڈال کھچا کھچ بھرا ہوا تھا۔ ضلع کے کونے کونے سے لوگ وزیر اعلیٰ کو سننے پہنچے تھے۔ اس کے لئے بی جے پی کی ضلع یونٹ کی طرف سے خصوصی بسوں کا بھی اہتمام کیا گیا تھا۔ وزیر اعلیٰ نے رام پور میں 20 ترقیاتی منصوبوں کا سنگ بنیاد رکھا جب کہ کئی پروجیکٹوں کا افتتاح بھی کیا۔ ان پروجیکٹوں میں 324 لاکھ فائر اسٹیشن بلاس پور، 274 لاکھ ترقیاتی بلاک، بلاس پور میں ڈگری کالج میں گرلز ہاسٹل کی تعمیر، 1142 لاکھ سوار میں پینے کے پانی کی انتظام، 120 لاکھ گائے کے تحفظ کے مرکز، نصیر آباد ملک میں تعمیراتی پروجیکٹ، سیفنی میں 73 لاکھ کی شہری ترقیاتی کے کام، 667 لاکھ سے شاہ آباد میں اسٹیٹ انڈسٹریل ٹریننگ سینٹر کی تعمیر، 141 لاکھ سے پولیس لائن میں 32 خواتین کے لیے ہاسٹل اور بیرکوں کی تعمیر، 537 لاکھ سے نوین منڈی بلاس پور کے احاطے میں 5 ہزار میٹرک ٹن گودام کی تعمیر، 483 لاکھ سے نوین منڈی رام پور کمپلیکس میں 5 ہزار میٹرک ٹن کے گودام کی تعمیر بھی شامل ہے۔ اس موقع پر سرکاری اسکیموں سے مستفید ہونے والے سیکڑوں مستحقین پنڈال پہنچے تھے جنھیں وزیر اعلیٰ نے اپنے ہاتھوں سے سرکاری اسکیموں کا فائدہ پہنچایا۔
جلسہ گاہ میں سخت حفاظتی انتظامات کیے گئے تھے۔ وزیر اعلیٰ کی آمد کے پیش نظر شہر بھر میں ٹریفک نظام تبدیل کیا گیا تھا اور کئی روٹ ڈائیورٹ کر دیے گئے تھے۔ شہر میں پولیس لائن سے جلسہ گاہ تک 4 زون اور 11 سیکٹر بنائے گئے تھے۔ 4 ایڈیشنل سپرنٹنڈنٹ آف پولیس اور 14 سی او کے ساتھ 250 انسپکٹرز اور 1200 کانسٹیبلوں کی بھی تعیناتی کی گئی تھی۔
