نئی دہلی :(ایجنسی)
دہلی حکومت پوری ریاست میں 104.37 کروڑ روپے خرچ کر کے 35 میٹر اونچے 500 جھنڈے لگانے جا رہی ہے۔ ہندوستان ٹائمز کی رپورٹ کے مطابق 2021-22 کے بجٹ میں جس کانام دیش بھکتی بجٹ تھا، اس میں سرکار نے اس پروجیکٹ کے لیے 45 کروڑ روپے مختص کئے تھے۔ ستمبر میں جاری پہلے ٹینڈر میں تخمینہ خرچ کو 84 کروڑ روپے کردیا گیا ہے ۔
ستمبر 23 کو ہوئی میٹنگ میں بتایا گیا کہ اس مالی سال کے دوران 45 کروڑ کی رقم منظور کی گئی ہے۔ ساتھ ہی اضافی بجٹ کا التزام بھی کیاجائےگا۔
ایچ ٹی کی رپورٹ کے مطابق حکومت نے 611 مقامات کی نشاندہی کی ہے جہاں جھنڈے لگائے جائیں گے،جس میں اسکول، دہلی حکومت کے دفاتر، ڈی ٹی سی بس ڈپو، عدالت، اسپتال وغیرہ شامل ہیں۔
بتادیں کہ دہلی حکومت اب تک پانچ مقامات پر ترنگا لگایا گیا ہے۔ وزیر اعلیٰ، نائب وزیر اعلیٰ، وزیر صحت، کالکاجی سے ایم ایل اے آتشی اور دوارکا کے ایم ایل اے ونے مشرا کے اسمبلی حلقہ میں ترنگا لہرایا گیا جاچکا ہے۔
