یوگی کو متھرا سے اتارنے کا مقصد کچھ اور ہی ہے

لکھنو:(ایجنسی)

اترپردیش کے وزیر اعلیٰ یوگی آدتیہ ناتھ نے واضح کیا کہ وہ آئندہ اسمبلی انتخاب لڑیں گے۔ حالانکہ وہ کہاں سے میدان میں اتریں گے، یہ ابھی تک واضح نہیں ہے۔ اس درمیان بی جے پی کے رکن پارلیمنٹ ہرناتھ سنگھ یادو نے پارٹی صدر جے پرکاش نڈا کو خط لکھ کر وزیر اعلیٰ یوگی آدتیہ ناتھ کو متھرا اسمبلی سیٹ سے الیکشن لڑوانے کی اپیل کی ہے۔

متھرا کے رہنے والے ہرناتھ سنگھ نے بی جے پی صدر جے پی نڈا کو خط لکھ کر کہا، ’وزیر اعلیٰ نے خود ہی اعلان کیا کہ پارٹی جہاں سے چاہے گی میں وہاں سے الیکشن لڑوں گا۔ اس لئے میں آپ سے انتہائی مخلصانہ الفاظ میں گزارش کرتا ہوں کہ برج علاقے کی عوام کو خصوصی خواہش ہے کہ یوگی جی بھگوان کرشن کی نگری متھرا سے الیکشن لڑیں‘۔

بی جے پی کے رکن پارلیمنٹ ہرناتھ سنگھ یادونے دعویٰ کیا کہ انہیں شری کرشن نے یہ خط لکھنے کے لئے ترغیب دیا ہے۔ اس کے ساتھ ہی انہوں نے لکھا، ’آپ سے مخلصانہ گزارش ہے کہ برج علاقے کے عوام کے جذبات کا خیال رکھتے ہوئے ریاست کے وزیر اعلیٰ یوگی آدتیہ ناتھ کو شری کرشن کی نگری سے امیدوار بنائے جانے پر غور کریں۔

واضح رہے کہ یوگی آدتیہ ناتھ اس وقت اترپردیش قانون ساز کونسل کے رکن ہیں۔ انہوں نے گزشتہ دنوں صحافیوں سے ایک رسمی بات چیت میں واضح کیا تھا کہ ’میرے الیکشن لڑنے پر کوئی تعطل نہیں ہے، لیکن میں الیکشن کہاں سے لڑوں گا اس بات کا فیصلہ پارٹی قیادت کرے گی‘۔ وزیر اعلیٰ سے جب پوچھا گیا کہ وہ ایودھیا سے الیکشن لڑیں گے یا متھرا سے یا گورکھپور سے، تب انہوں نے کہا، ’پارٹی جہاں سے کہے گی، میں وہاں سے الیکشن لڑوں گا‘۔