نئی دہلی : (ایجنسی)
انتخابی پالیسی ساز پرشانت کشور جلد کانگریس جوائن کر سکتے ہیں۔ انہیں کانگریس میں شامل کرنے کا آخری فیصلہ پارٹی صدر سونیا گاندھی کریں گی۔ ٹائمس آف انڈیا ‘ کی ایک رپورٹ کے مطابق انہیں خصوصی اے آئی سی سی پینل کے ذریعہ شامل کیاجائے گا۔
کانگریس صدرسونیا گاندھی اس معاملہ سے پوری طرح آگاہ ہیں اور ذرائع کے مطابق کشور کو لےکر جولائی کے بعد سے کوئی بحث نہیں ہوئی ہے۔ اس دوران کانگریس مانسون سیشن کے ساتھ -ساتھ دیگر پیش رفتوں میں مصرو ف تھی۔ رپورٹ کے مطابق اگر ہائی پروفائل انتخابی پالیسی ساز کانگریس شامل ہوتے ہیں تو انہیں پینل کے راستے پارٹی میں شامل کیا جائے گا۔ ٹی او آئی کی رپورٹ کے مطابق کشور نے کانگریس قیادت سے پارٹی کی حکمت عملی اور انتخابی انتظامات پر فیصلے لینے کے لیے ایک ’ بااختیار گروپ‘تشکیل دیا ہے ۔
کانگریس 2024 کے لوک سبھا انتخابات کے علاوہ آئندہ اسمبلی انتخابات کو بھی مدنظر رکھتے ہوئے کشور کو اپنی پارٹی سے جوڑے گی۔ آنے والے وقت میں اترپردیش ، پنجاب، اتراکھنڈ ، گوا اور منی پور میں اسمبلی انتخابات ہونے جا رہے ہیں۔ اگلے سال فروری مارچ کے آس پاس پانچ ریاستوں میں انتخابات ہونے ہیں۔
یہ انتخابات کانگریس کے لیے اہم ہیں۔ انہوں نے گزشتہ چند انتخابات میں اچھی کارکردگی نہیں دکھائی۔ اس سے کارکنان کے حوصلے پست ہو گئے ہیں۔ کشور نے حال ہی میں ترنمول کانگریس کے ساتھ کام کیا تھا اور مغربی بنگال اسمبلی انتخابات میں پارٹی کی زبردست جیت میں کلیدی کردار ادا کیا تھا، چونکہ کشور انتخابات سے متعلقہ مسائل پر مکمل رول اور فیصلہ سازی کا اختیار چاہتے ہیں ، پارٹی کے رہنما امیدواروں کے انتخاب پر کسی فرد کو آزادانہ ہاتھ دینے کے خلاف ہیں۔
ذرائع نے بتایا کہ کشور کو الیکشن مینجمنٹ کا انچارج جنرل سکریٹری مقرر کیا جاسکتا ہے ، لیکن پارٹی کے سینئرز کا کہنا ہے کہ انتخابات کی واحد ذمہ داری ایک شخص کو دینا اچھا خیال نہیں ہے، کیونکہکشور پر مکمل اعتبار نہیں کیا جا سکتا۔ تاہم ، کوئی بھی ان کے پارٹی میں شامل ہونے کے خلاف نہیں ہے۔
